Bllokohet qarkullimi i makinave në Llogara prej reshjeve të dëborës

Reshjet e dëborës kanë shkaktuar bllokim të automjeteve që kalonin qafën e Llogarasë ditën e sotme. Këto pamje të ardhura pranë redaksisë së Euronews Albania shfaqin qytetarë të cilët e kanë pasur të pamundur kalimin me automjetet e tyre prej situatës së krijuar në rrugë nga kushtet atmosferike.

“Prej tre orësh vijon të jetë i bllokuar aksi rrugor Dukat-Qafa e Llogorasë. Prej më shumë se katër kilometrash ky aks rrugor është i pakalueshëm nga prania e dëborës në rrugë,” raporton korrespondetja e Euronews Albania në Vlorë, Ebrieta Maçaj.

Moti i përkeqësuar i ka gjetur të papërgatitur drejtuesit e automjeteve në marrjen e zinxhirëve. Ndërkohë dy borëpastruesit dhe një fadromë e ndodhur në terren po hasin vështirësi në ndërhyrje pasi rruga është e bllokuar si pasojë e trafikut të rënduar.

Prefektura e qarkut Vlorë ka pohuar situatën duke u bërë thirrje qytetarëve të tregojnë kujdes të shtuar në zonë.

“Rreshjet me intensitet të dëborës në Llogara kanë rritur angazhimin e firmës kontraktore dhe Policisë Rrugore për të përballuar këtë situatë në të gjithë aksin rrugor Orikum-Llogara-Palasë,” shkruan në Facebook, prefektura e Vlorës.

Emergjencat civile pranë prefekturës së qarkut bëjnë me dije se situata është drejt normalizimit, mësuan gazetarët tanë.