Bojkoti i futbollit, paralajmërohet protestë masive më 10 tetor

Në një kohë kur ende nuk ka një zgjidhje mes qeverisë dhe Ligës së Profesioniste të Futbollit për ndërprerjen e bojkotit, është paralajmëruar mbajtja e një proteste masive javën e ardhshme.

Vendimi është marrë sot nga anëtarët e LPF-së të cilët u mblodhën për të diskutuar në lidhje me çështjet organizative dhe me vijimin e bojkotit të kampionatit të Kategorisë Superiore.

“LPF do të intensifikojë kontaktet me negociatorin e qeverisë z. Fidel Ylli dhe për këtë ngarkohet Kryetari i Ligës dhe Sekretari i përgjithshëm për te ndjekur hap pas hapi ecurinë dhe reagimin e qeverisë pas dërgimit të relacionit shpjegues për kërkesat e Ligës.

LPF është e vendosur për vazhdimin e bojkotit dhe përshkallëzimin e protestave, duke projektuar protestën masive të futbollistëve më datë 10 tetor 2020. Për këtë do të ngrihet një grup pune për organizimin e saj dhe sensibilizimin e opinionit publik”, thuhet në deklaratë.

Deri më tani nuk kemi asnjë reagim nga qeveria për katër kërkesat e anëtarëve të Ligës Profesioniste të Futbollit.