“Bomba” e princit Harry: William më sulmoi fizikisht dhe më rrëzoi në tokë

Në librin që konsiderohet si bomba që do të tronditë pallatin Buckingham, princi Harry aludon se vëllai i tij, princi William e ka sulmuar fizikisht.

Kështu thotë gazeta britanike “The Guardian”, e cila pretendon se ka mbikëqyrur një kopje të librit të ardhshëm të Harryt.

Nuk është sekret që dy vëllezërit kanë qenë në konflikt, në atë që përshkruhet si “përçarja mbretërore”.

Burime nga pallati mbretëror thonë se gjithçka filloi Krishtlindjen e vitit 2018. Sipas gazetës, bëhet fjalë për një debat mes vëllezërve lidhur me bashkëshorten e Harryt, Meghan, në shtëpinë e tij në Londër.

Në libër, Harry thotë se William e quajti Meghan një person “të vështirë, të paedukatë dhe të bezdisshëm” dhe kritikonte martesën mes tyre.

Në këmbim, Harry i tha vëllait të madh se po përsëriste si papagall ato që shkruheshin në shtyp. Situata u përshkallëzua kur, sipas princit të vogël, i madhi e shtyu dhe e rrëzoi në tokë.

Dy vjet më parë, Harry dhe bashkëshortja e tij braktisën familjen mbretërore. Çifti ishte në Londër vitin e kaluar për varrimin e mbretëreshës Elizabeth, kur burimet sugjeruan rritjen e tensioneve. Ndërkohë, nga pallati Buckingham nuk ka pasur ende një reagim.

LEXONI GJITHASHTU:

• “Ka ndryshuar për keq nga martesa”- Miqte e Princit William kritikojnë Harryn
• Princi Harry Spiderman i ri, duka i Sussex surprizon fëmijët i veshur si superhero