Temperaturat e ulëta në gjithë vendin janë shoqëruar me reshje dëbore në zonat malore.

Sipas Autoritetit Rrugor Shqiptar, reshjet nuk kanë sjellë probleme në qarkullim, por rekomandohet që në akset Qafë Bualli-Krastë, Ura e Cerenecit-Klenjë, Nikollare-Strelcë, Qafë Priskë-Qafë Mollë, dhe në fshatrat turistikë të Dardhës e Voskopojës kalimi të bëhet me zinxhirë.

Gazetari i Euronews Albania, Xhensil Shkëmbi raportoi se në zonat malore të Korçës trashësia e dëborës ka shkuar deri në 40 cm.

“Trashësia e dëborës është 40 cm në zonat malore. Ka probleme në rrugët që të të çojnë drejt fshatrave turistikë të Voskopojës, Dardhës dhe në Qafën e Qarit. Në këto rrugë është domosdoshmëri përdorimi zinxhirëve”, tha gazetari.

Temperaturat në këto fshatra shkojnë deri në -8 gradë.

Po kështu, në qarkun e Korçës, reshjet e dëborës sjellë probleme në rrjetin elektrik, ku disa zona kanë mbetur pa elektricitet.