Përfaqësuesi i Lartë i BE-së për Politikë të Jashtme, Josep Borell, tha sot se në ditët në vijim pritet një përgjigje nga Beogradi dhe Prishtina ndaj propozimit gjermano-francez për normalizimin e marrëdhënieve mes dy palëve.

“Në ditët në vijim do të shohim se si do të jetë përgjigja ndaj këtij propozimi. Shpresoj se ai do të lejojë përparim dhe një hap përpara në proces”, tha Borell në Mynih, ku po merr pjesë në takimin e G7.

Borell theksoi se është e nevojshme “të kapërcehet trashëgimia e së kaluarës” dhe të normalizohen marrëdhëniet ndërmjet Beogradit dhe Prishtinës dhe se pikërisht këtë duhet ta mundësojë dialogu.

“Ne jemi duke punuar shumë për këtë, me të dërguarin special Miroslav Lajçak. Para verës, ne prezantuam një plan për të kapërcyer atmosferën e krizës së përhershme dhe për të gjetur një mënyrë për një normalizim të gjerë të marrëdhënieve. Unë jam mirënjohës për mbështetjen që marrim nga Gjermania dhe Franca për këtë plan”, tha Borell.

Ai vlerëson se kjo është një mundësi e mirë për normalizimin e marrëdhënieve ndërmjet Beogradit dhe Prishtinës dhe thekson se normalizimi i marrëdhënieve është shumë i rëndësishëm për përparimin e të dyja palëve në rrugën evropiane.

LEXONI GJITHASHTU:

• Kurti: Çfarë i kërkova Borrellit për djegien e veturave në veri të Kosovës
• Borrell bisedë me Kurtin: I rëndësishëm stabiliteti në Ballkanin Perëndimor