Bosnja të përshpejtojë harmonizimin e politikave nëse do t’i bashkohet unionit, deklaron Borrell

Bashkimi Europian mbetet i angazhuar në anëtarësimin e Bosnjës dhe Hercegovinës, por paralajmëroi se ka ende shumë punë për të bërë.

Kryeministri i Bosnjës Zoran Tegeltija ishte të martën në Bruksel për të biseduar me shefin e politikës së jashtme Josep Borrell mbi progresin e bërë në rrugëtimin e vendit drejt unionit.

Bisedimet vijnë në mesin e një situate skepticizmi të shtuar mbi zgjerimin e kufijve të unionit . Një dokument jo zyrtar (non-paper) që u publikua në media në muajin prill, ku pretendohej për ndryshimin e kufijve të kombeve të Ballkanit Perëndimor, solli edhe më shumë skepticizëm mbi përkushtimin e Brukselit ndaj rajonit.

Në dokument propozohej që Serbia, Kroacia dhe Shqipëria të zgjeroheshin duke gllabëruar pjesë të fqinjëve si Bosnja, Maqedonia e Veriut dhe Kosova.

Pavarësisht garancive se unioni do i qëndrojë procesit të anëtarësimit, Borrell rikujtoi kryeministrin Tegeltija se vendi i tij ka ende shumë punë për të bërë.

“BE thekson angazhimin e palëkundur ndaj perspektivës europiane të Bosnjës dhe Hercegovinës si një vend i vetëm, i bashkuar e sovran si dhe përkushtimin tonë për t’i qëndruar në krah”, tha Borrell gjatë një konference të përbashkët për shtyp me Tegeltija.

“Gjithashtu, inkurajojmë Bosnjën dhe Hercegovinën që të përshpejtojë harmonizimin me vendimet e jashtme dhe të sigurisë së BE”, shtoi ai.

“Më vjen keq që kjo ka pësuar rënie në muajt e parë të këtij viti. Kjo sigurisht që nuk është në një linjë me aspiratat për t’u bërë një vend kandidat i Bashkimit Europian”.

Bosnja dhe Hercegovina i ka ulur ritmet e implementimit të reformave në fushën e shtetit të së drejtës, dhënies fund së glorifikimit të personave të dënuar për krime lufte si dhe reformës zgjedhore.

LEXONI GJITHASHTU: 

• Presidenti i serbëve të Bosnje-Hercegovinës: Kriza zhduket kur të zhduket Bosnja
• Raportuesja për Kosovën në PE: Dokumentet ‘non-papers’ janë hartuar në Moskë
• Tenda për emigrantët, liderët e BE-së kritika Bosnjës për menaxhimin e situatës