Brisbane fiton të drejtën për të organizuar Lojërat Olimpike të vitit 2032

Komiteti Olimpik Ndërkombëtar shpalli zyrtarisht sot qytetin lindor të Australisë, Brisbane, si vend organizator për Lojërat Olimpike të vitit 2032.

Qyteti australian ishte shpallur si më i preferuari që në qershor në përzgjedhjet paraprake të kandidaturave përpara se t’u paraqitej zyrtarisht Komitetit.

Kjo do të jetë hera e tretë që Australia do të organizojë Lojërat Olimpike, pas atyre të Sidnejt në vitin 1956 dhe 2000.

Vendimi u prit me festime nga autoritetet lokale të Qeensland në Brisbane, teksa ata janë zotuar se do të bëjnë çmos për të garantuar infrastrukturën dhe kushtet e nevojshme për një organizim dinjitoz.

BRISBANE 2032 ELECTED AS HOST OF THE GAMES OF THE XXXV OLYMPIAD!

CONGRATULATIONS! pic.twitter.com/h66C9pHxcG

— IOC MEDIA (@iocmedia) July 21, 2021

Planet e autoriteteve australiane parashikojnë ripërdorimin deri në 84% të impianteve aktuale sportive për të reduktuar kostot dhe ndërhyrjet në qytet dhe zhvillimin e disa hapësirave të përkohshme qoftë për fshatin Olimpik, po ashtu për disa prej terreneve sportive që do të nevojiten.

Disa qytete dhe shtete patën paraqitur kandidaturën, përfshirë Indonezinë, Kinën, Katarin, Hungarinë apo dhe Gjermaninë, mirëpo ato u skualifikuan në përzgjedhjen fillestare në qershor.

Lojërat Olimpike aktualisht po zhvillohen në Tokio me një vit vonesë për shkak të pandemisë.

Për sa i përket aktiviteteve të tjera deri në vitin 2032 – kur do të organizohet në Australi, – është vendosur që më parë që Lojërat Olimpike të vitit 2024 do të zhvillohen në Paris (Francë) dhe ato të vitit 2028 në Los Angeles (SHBA).

LEXONI GJITHASHTU:

• Milwaukee Bucks shpallen kampionë të NBA pas 50 vitesh