Britania e Madhe tërheq stafin e ambasadës në Teheran, shkak tensionet SHBA-Iran

Mbretëria e Bashkuar ka tërhequr përkohësisht stafin nga ambasada e saj në Teheran. Në një deklaratë, Ministria e Jashtme e Mbretërisë së Bashkuar tha se ambasada e saj në kryeqytetin e Iranit do të vazhdojë të operojë nga distanca.

Ndërkohë, ambasada amerikane në Izrael u tha disa punonjësve se mund të largoheshin nga vendi të premten. Ambasadori i SHBA-së në Izrael, Mike Huckabee, i këshilloi stafin që dëshironte të largohej ta bënte këtë sot.

Kjo vjen një ditë pasi Uashingtoni dhe Teherani zhvilluan bisedime, të cilat shihen gjerësisht si një përpjekje e fundit për të shmangur një luftë për shkak të ambicieve bërthamore të Iranit.

Një numër vendesh të tjera, përfshirë Kinën, Indinë dhe Kanadanë, u kanë thënë qytetarëve të tyre të largohen nga Irani sa më shpejt të jetë e mundur për shkak të mundësisë së armiqësive dhe tensioneve në rritje me SHBA-në.

Presidenti i SHBA-së, Donald Trump, ka kërcënuar me veprime ushtarake kundër Teheranit nëse nuk arrin një marrëveshje për programin e tij bërthamor.

Ai ka urdhëruar grumbullimin më të madh ushtarak amerikan në Lindjen e Mesme që nga pushtimi i Irakut i udhëhequr nga SHBA-të në vitin 2003, ndërsa Irani është zotuar të përgjigjet me forcë ndaj një sulmi.