Britania merr rol udhëheqës në Evropë: Apeli për Gjermaninë dhe Francën

Kryeministri i Mbretërisë së Bashkuar, Keir Starmer, u ka bërë thirrje aleatëve evropianë që të rrisin shpenzimet për mbrojtjen, ndërsa liderët e kontinentit përgatiten të takohen në Paris për diskutime mbi Ukrainën dhe sigurinë evropiane.

Starmer theksoi se Mbretëria e Bashkuar është e gatshme të marrë një rol udhëheqës në këtë drejtim, duke nënvizuar rëndësinë e një mbrojtjeje të fortë jo vetëm për Ukrainën, por për gjithë Evropën.

“Kjo nuk ka të bëjë vetëm me vijën e parë në Ukrainë, por me sigurinë kombëtare të Evropës dhe Mbretërisë së Bashkuar. Mendoj se duhet të bëjmë më shumë,” deklaroi ai.

Në lidhje me një marrëveshje të mundshme armëpushimi mes Ukrainës dhe Rusisë, Starmer u shpreh se ajo duhet të jetë “e qëndrueshme, e drejtë dhe afatgjatë”. Ai shtoi se nuk dëshiron të shohë thjesht një amëpushim të përkohshëm që “thjesht i jep Putinit një shans për të sulmuar përsëri”.

Kryeministri britanik e cilësoi situatën aktuale si një “sfidë brezash” për sigurinë kombëtare dhe nënvizoi se pavarësisht rrjedhës së konfliktit, Mbretëria e Bashkuar duhet të sigurojë që Ukraina të jetë në “pozicionin më të fortë të mundshëm”.

Starmer ka sugjeruar më herët se Britania është e gatshme të dërgojë trupa në Ukrainë si pjesë e një force paqeruajtëse pas përfundimit të luftës.

LEXONI GJITHASHTU:

• Zelensky: Ukraina nuk u ftua për bisedimet SHBA-Rusi në Arabinë Saudite
• Starmer: I gatshëm të vendos trupa në terren në Ukrainë për të mbrojtur paqen