Britania tërheq ambasadorin nga Teherani pas ekzekutimit të ish-zyrtarit

Britania e Madhe tërhoqi ambasadorin e saj në Teheran pas ekzekutimit të shtetasit britaniko-iranian Alireza Akbari, i dënuar për spiunazh.

Sekretari i Jashtëm britanik, James Cleverley, theksoi në një postim në Tëitter se Londra po mban përgjegjës regjimin iranian.

“Përgjigja jonë ndaj Iranit nuk është e kufizuar në veprimet e sotme. Ne po shqyrtojmë hapat e mëtejshëm”, shtoi ai.

Më herët, Britania vendosi sanksione ndaj Prokurorit të Përgjithshëm të Iranit, Mohammad Jafar Montazeri për varjen e shtetasit britaniko-iranian Alireza Akbari.

Siç u raportua në Teheran, ai u dënua me vdekje për akuzën e spiunimit për shërbimin e inteligjencës të qeverisë britanike.

Alireza Akbari ka mbajtur më parë një post të lartë qeveritar në Ministrinë e Mbrojtjes të Iranit nën presidentin e moderuar Mohammad Khatami dhe u arrestua tre vjet më parë gjatë vizitës në Teheran.

Lidhjet midis Londrës dhe Teheranit janë përkeqësuar muajt e fundit pasi përpjekjet për të ringjallur marrëveshjen bërthamore të Iranit të vitit 2015, në të cilën Britania është palë, kanë ngecur. Britania ka kritikuar gjithashtu autoritetet iraniane për shtypjen e dhunshme të protestave të shkaktuara nga vdekja në paraburgim e vajzës kurde 22-vjeçare Mahsa Amini.

LEXONI GJITHASHTU:

• Irani ekzekuton ish-zëvendësministrin e Mbrojtjes
• Macron: Ekzekutimi i fundit i Iranit, akt i urryer dhe barbar