Futbollisti Robert Lewandowski shënoi një tjetër rekord duke vulosur edhe më tej emrin e tij në historinë e futbollit gjerman.

Në fitoren 2-1 që Bayern Munich arriti të dielën ndaj Frieburg, sulmuesi polak u bë i pari futbollist që shënon 21 gola në 16 ndeshje.

I shpallur futbollisti më i mirë i vitit 2020 nga UEFA dhe FIFA, Lewandowski realizoi që në minutën e 7-të duke vijuar serinë prej gjashtë javësh radhazi me realizime golash – 9 gola në 6 ndeshje nga 12 dhjetori.

Me këtë realizim Lewandowski theu rekordin e të famshmit Gerd Müller, i cili në sezonin 1968-69 pati realizuar 20 gola në 16 ndeshjet e para të kampionatit.

Synimi i polakut mbetet i njëjti me atë të një sezoni më parë, thyerja e rekordit tjetër të Muller, atë të më shumë golave të realizuara në kampionatin gjerman – 40 gola.

Rekordi në fjalë ka rreth 50 vite që nuk thyhet. Sezonin që shkoi Lewandowski realizoi 55 gola në 47 ndeshje, por prej tyre vetëm 34 ishin në kampionat.

Me 21 realizime këtë sezon, ai synon ta diskutojë sërish këtë rekord.