Burg për 5 grabitësit e vilave, planifikonin të vidhnin edhe banesën e një zyrtari të lartë

Gjykata e Tiranës ka lënë në burg 5 personat që dyshohen për vjedhjen e vilave luksoze në kryeqytet. Dorjan Lamani, i njohur edhe si Hektor Qirjazi, Klodian Çypi, Halil Topalli, Redian Begaj, dhe Dajvid Dosti, do të qëndrojë në burg deri në përfundim të hetimeve. Gjatë seancës për caktimin e masës së sigurisë ndaj këtyre personave që u zhvillua me dyer të mbyllura  janë mësuar detaje të reja nga dosja hetimore.

Referuar kësaj të fundit mësohet grupi i grabitësve, anëtarët e të cilit janë me precedent të mëparshëm penal, ishte nën vëzhgim prej 2 muajsh nga agjentët e policisë së Tiranës. Policia kishte marrë informacione se grupi po planifikonte grabitjen me armë të një pike të këmbimit valutor në Tiranë dhe pas kësaj planifikonin edhe grabitjen e një banese të një zyrtari të lartë. Sipas informacioneve të policisë në rrugë operative grupi i grabitësve kishte informacione se në këtë banesë kishte shuma të mëdha parash.

Në dosjen e zbardhur është edhe dëshmia e një prej 5 grabitësve të arrestuar, konkretisht  e Dajvid Dostit, i cili është shprehur se ai është kontaktuar nga Hektori Qirjazi I cili e kishte instruktuar për të vjedhur banesën në një rezidencë në zonën e lundrës, ku në kasafortë gjeti 16 mijë euro dhe bizhuteri më vlerë.