Burnham, kandidati favorit për kryeministër britanik prezanton vizionin për të ardhmen e Britanisë

Andy Burnham, kandidati favorit për të pasuar Keir Starmer në postin e kryeministrit britanik, pritet të prezantojë këtë të hënë vizionin e tij për të ardhmen e Britanisë, me fokus decentralizimin e pushtetit dhe forcimin e rajoneve.

Burnham, i cili u rikthye në Parlament pas zgjedhjeve të fundit dhe është aktualisht i vetmi kandidat i deklaruar për drejtimin e Partisë Laburiste, mund të marrë drejtimin e qeverisë brenda pak javësh, pas njoftimit të Keir Starmer për dorëheqjen.

I njohur për punën e tij si kryetar i Bashkisë së Mançesterit të Madh dhe me nofkën “Mbreti i Veriut”, Burnham do të propozojë zhvendosjen e më shumë kompetencave nga Londra drejt autoriteteve lokale, duke e cilësuar këtë si një reformë thelbësore për mënyrën se si qeveriset vendi.

Në fjalimin e tij ai do të paraqesë edhe një plan 10-vjeçar për rritjen e standardit të jetesës përmes riindustrializimit, investimeve në strehim, infrastrukturë dhe reformimit të shërbimeve publike. Gjithashtu, Burnham do të premtojë ndryshime në sistemin e prokurimeve publike për të mbështetur më mirë industrinë dhe vendet e punës në Britani.

Nëse merr drejtimin e qeverisë, Burnham do të bëhet kryeministri i shtatë i Britanisë në dhjetë vitet e fundit. Mbështetësit e tij besojnë se ai ka profilin dhe vizionin për të rikthyer besimin e votuesve dhe për t’iu kundërvënë rritjes së mbështetjes për partinë anti-imigracion Reform UK të Nigel Farage.