Numri i fermerëve që do të përfitojnë naftë falas, pritet të rritet gradualisht gjatë viteve të ardhshme. Në planin e Ministrisë e Bujqësisë, nga 31 500 fermerë që marrin karburant përmes skemës kombëtare sot, në vitin 2026 numri do të rritet në 32.500 dhe në 2027 do të arrijë në 33 mijë.

Të dhënat tregojnë se kërkesat janë më të larta, me numrin e aplikimeve që arrijnë në 55 mijë cdo vit, por numri i përfituesve është më i ulët për shkak të regjistrimit të tyre në sistem.

Por, përvec fermerëve edhe fondi që ndan qeveria cdo vit është i limituar. Vetë, Ministria e Bujqësisë është shprehur se fondi vjetor është 12 milionë euro dhe ai ndahet në mënyrë proporcionale për aplikuesit që plotësojnë kriteret.

Të dhënat tregojnë se qarku Fier, është ai që kryeson për nga numri i aplikantëve dhe përfituesve, ndjekur nga Qarku i Korçës, Beratit, Shkodrës, Elbasanit dhe Vlorës.

Përfitimi për sipërfaqen që kultivohet varion, deri në 100% të vlerës, për fermerët me sipërfaqe toke deri në 10 hektarë dhe 50% për sipëraqen më të madhe se 10 hektarë.

Skema e mbështetjes me naftë ka ndryshuar dhe nuk bëhet përmes kartave si vitet e kaluara, por me pará të cilat kalojnë në llogaritë e fermerëve.