Ceremonia e pishtarit olimpik shënon numërimin mbrapsht për Olimpiadën “Tokyo 2020”

Ceremonia e pishtarit olimpik u bë pa spektatorë këtë vit, me flakën që garuesi i Lojërave Paraolimpike, Aki Taguchi dhe ish-tenisti Shuzo Matsuoka ia dorëzuan guvernatorit të Tokios, Yuriko Koike.

Kjo ceremoni shënoi fillimin e numërimit mbrapsht për nisjen e Lojërave Olimpike 2020 dhe duket se është një shenjë paralajmëruese se si do të zhvillohen garat, pra, kryesisht pa spektatorë.

Zyrtarët japonezë njoftuan së fundmi se tifozët nuk do të lejohen të marrin pjesë në shumicën e garave, për shkak të gjendjes së jashtëzakonshme si pasojë e pandemisë.

Realizimi i Lojërave Olimpike entuziazmoi për një farë kohe qytetarët e Japonisë, mirëpo kur u pa se pandemia e COVID-19 po këmbëngulte, atëherë qytetarët dolën në rrugë dhe bënë thirrje për anulimin e tyre.

Rritja e infeksioneve ishte edhe arsyeja pse pishtari olimpik nuk u ekspozua nëpër rrugët e Tokios. Kjo ceremoni është planifikuar dhe anuluar disa herë që prej muajit mars, në pritje të përmirësimit të situatës së COVID-19.

Mbetet e paqartë se si pishtari do të hyjë në stadium për ceremoninë e hapjes, ndërsa Lojërat Olimpike pritet të fillojnë me datë 23 korrik.

Çfarë është pishtari olimpik?

Simpoli i pishtarit olimpik e ka origjinën në Greqinë e lashtë, ku një zjarr i shenjtë mbahej i ndezur në altarin e perëndeshës Hestia gjatë gjithë kremtimit të Olimpiadës antike. Në mitologjinë greke thuhet se Prometeu ua vodhi zjarrin perëndive, për t’ua sjellë njerëzve. Zjarri simbolizon hyjnoren, dijen, dritën.

Mirëpo pishtari olimpik u bë edhe një simbol i Lojërave Olimpike moderne. Disa muaj para Lojërave Olimpike, pishtari olimpik ndizet në Olimpia, në Greqi. Zjarri ndizet nga rrezet e diellit, të përqendruara nga një pasqyrë parabolike. Pasi pishtari të ndizet, ai transportohet në formë stafete pa u fikur, për të përfunduar në vatrën e flakës në ceremoninë e hapjes së Lojërave Olimpike, në qytetin ku ato po zhvillohen. Flaka vijon të mbetet e ndezur në vatër përgjatë të gjithë lojërave, deri në ceremoninë e mbylljes.

LEXONI GJITHASHTU:

• Lojërat olimpike në Tokio, Shqipëria përfaqësohet me nëntë sportistë që garojnë për medalje
• Olimpistët e Kosovës, 11 sportistë gati për lojërat e “Tokio 2020”
• Protesta në Tokio, kërkohet anulimi i Lojërave Olimpike
• “Tokio 2020” pa spektatorë, vendimi pas shpalljes së gjendjes së jashtëzakonshme