Irani ka dërguar një përgjigje zyrtare për një letër të Presidentit të SHBA-së, Donald Trump, i cili kishte kërkuar bisedime për programin bërthamor të Iranit dhe kishte paralajmëruar mundësinë e një veprimi ushtarak në rast refuzimi. Ministri i Jashtëm i Iranit, Abbas Araghchi, konfirmoi dorëzimin e përgjigjes, duke shpjeguar se pozita e Iranit për situatën aktuale dhe kërkesën e Trumpit është përfshirë në letër.

Araghchi tha se letra ishte dorëzuar në Oman, një vend që ka shërbyer si ndërmjetës për shkak të mungesës së marrëdhënieve diplomatike zyrtare mes SHBA-së dhe Iranit. Ky zhvillim ka ndodhur pasi Trump ka shprehur gatishmërinë për bisedime diplomatike, pas tërheqjes së SHBA-së nga marrëveshja bërthamore e vitit 2015, e cila i dha Iranit lehtësim sanksionesh në këmbim të kufizimeve të programit të tij bërthamor.

Presidenti Trump zbuloi në fillim të marsit se kishte dërguar një letër drejtuar udhëheqësit suprem të Iranit, Ali Khamenei. Megjithatë, Trump ka vazhduar politikën e tij të “presionit maksimal”, duke shtuar sanksione ndaj Iranit dhe kërcënuar me mundësi veprime ushtarake në rast të refuzimit të negociatave nga Teherani.

Ministri Araghchi e ka ripërsëritur kundërshtimin e Iranit ndaj negociatave direkte me SHBA-të, duke theksuar se vendimi i Iranit mbetet që të mos negociohet nën “presionin maksimal”. Sipas tij, negociatat indirekte mund të vazhdojnë, siç ka ndodhur në të kaluarën, por nuk do të ketë bisedime të drejtpërdrejta nën kërcënimin e veprimeve ushtarake.

Irani dhe SHBA-ja nuk kanë pasur marrëdhënie diplomatike zyrtare që nga vitit 1980, por kanë zhvilluar marrëdhënie indirekte përmes ambasadës zvicerane në Teheran, e cila përfaqëson interesat amerikane. Oman dhe Katari kanë luajtur gjithashtu rolin e ndërmjetësuesve në të kaluarën.

Irani ka arritur një marrëveshje për kufizimin e programit të tij bërthamor në vitin 2015 pas negociatave me fuqitë kryesore, përfshirë SHBA-në dhe Kinën. Pas tërheqjes së SHBA-së nga marrëveshja, Irani ka vazhduar të respektojë angazhimet e tij për një vit, përpara se të fillonte të tërhiqte disa prej angazhimeve të tij, sipas Agjencisë Ndërkombëtare të Energjisë Bërthamore.

LEXONI GJITHASHTU:

• Skandal në kabinetin Trump, i dërgojnë gazetarit planin sekret të luftës
• Trump dërgon bombarduesit e “frikshëm” afër bastioneve të Huthit, mesazhi për Iranin