Çfarë është Asociacioni i Komunave me shumicë serbe?            

Gabriel Escobar dhe Mirosllav Lajçak sot vizitojnë Kosovën. Nga diplomatët e lartë priten mesazhe për dialogun me Serbinë dhe Asociacionin e komunave serbe.

Mesazhet kryesore të tyre për institucionet në Kosovë pritet të jenë rifillimi i dialogut dhe zbatimi i marrëveshjeve të kaluara me Serbinë, përfshirë Asociacionin.

Zyrtarët e Kosovës e kanë cilësuar si të dëmshme këtë marrëveshje për shkak se u jep komunave me shumicë serbe një lloj autonomie për të vetëvendosur.

Kryeministri Kurti e ka cilësuar Asociacionin si “bosnjezim të Kosovës”.

Çfarë është Asociacioni i Komunave me shumicë serbe?             

Asociacioni i komunave me shumicë serbe parashikohet që të përfshijë dhjetë komuna në Kosovë ku shumica e popullsisë janë serbë: Mitrovicë e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviq dhe Shtërpcë.

Themelimi i Asociacionit është parashikuar të krijohet që në vitin 2013 me Marrëveshjen e Brukselit të arritur mes Kosovës dhe Serbisë.

Asociacioni ka për qëllim të përfaqësojë interesat e qytetarëve të këtyre komunave, kryesisht në fushën e arsimit, shëndetësisë, planifikimit urban dhe rural si dhe të ekonomisë.

Në një nga pikat e para të marrëveshjes thuhet se në pajtim me kompetencat e ofruara nga Karta Evropiane për Vetëqeverisje Lokale dhe ligjin e Kosovës për këtë çështje, komunat pjesëmarrëse do të kenë mundësi që të bashkëpunojnë për të ushtruar fuqinë e tyre në gjithë Asociacionin.

Marrëveshja fillestare thekson se Asociacioni do të krijohet mbi bazën e statutit të Asociacionit të komunave të Kosovës – që është një organizatë jofitimprurëse e themeluar për t’i përfaqësuar dhe për t’u shërbyer interesave të këtyre komunave.

Përshkrimi i Asociacionit nga marrëveshja fillestare

Asociacioni i komunave të Kosovës parashihet të funksionojë në Kosovë si organizatë jofitimprurëse e themeluar për t’u shërbyer interesave të komunave të Kosovës.

Kuvendi i tij ka 126 anëtarë dhe përbëhet nga të gjithë kryetarët e komunave dhe nga një këshilltar i zgjedhur për secilin nga dhjetë këshilltarët komunalë dhe përfaqësues nga komunitetet jo-shumicë në kuvendet e komunave.

Misioni i Asociacionit është të krijojë qeverisje lokale efikase, të qëndrueshme dhe demokratike për të përmbushur nevojat dhe shërbimet e komunave.

Marrëveshja shtesë mbi parimet e Asociacionit

Pas marrëveshjes së vitit 2013, Kosova dhe Serbia në Bruksel në vitin 2015 kanë arritur edhe një marrëveshje shtesë për themelimin e Asociacionit.

Kjo marrëveshje parashikon se Asociacioni do të ketë organet dhe strukturën organizative.

Sipas saj, Asociacioni është pritet të ketë një Kuvend si organ suprem, të përbërë nga përfaqësues të emëruar prej anëtarëve të zgjedhur nga kuvendet e komunave pjesëmarrëse.

Është parashikuar që Kuvendi i Asociacionit të ketë të drejtë të miratojë amendamentet e statutit, rregulloren e punës dhe të gjitha rregulloret e nevojshme dhe udhëzimet administrative në pajtim me statutin që ndërlidhet me objektivat e tij.

Asociacioni pritet të ketë një president dhe një zëvendës president. Presidentin dhe zëvendës presidentin do t’i zgjedhë kuvendi në mesin e anëtarëve të kuvendeve komunale pjesëmarrëse dhe kryetarëve të komunave të tyre.

Ky organ do të ketë buxhetin e tij, i cili do të administrohet në përputhje me parimet e transparencës e llogaridhënies dhe dispozitave të Ligjit mbi prokurimin publik.

Gjykata Kushtetuese e Republikës së Kosovës më 23 dhjetor 2015 kishte marrë vendim që Asociacioni i komunave me shumicë serbe të themelohet ashtu siç është paraparë me Marrëveshjen e parë të Brukselit.

Mirëpo, gjykata kishte konstatuar se parimet e përgjithshme të Asociacionit nuk janë tërësisht në përputhshmëri me frymën e Kushtetutës.

Bashkimi Evropian i mbetet qëndrimit se të gjitha marrëveshjet e arritura në dialogun mes Kosovës dhe Serbisë duhet të zbatohen, por duhet të merret parasysh edhe mendimi i Gjykatës Kushtetuese të Kosovës.

LEXONI GJITHASHTU:

• Çfarë pritet nga vizita Lajçak dhe Escobar në Kosovë?
• Osmani fajëson ish-kryeministrat për marrëveshje të dëmshme