Cilat janë vendet me më shumë gra në qeveri

12 nga 15 ministrat e kabinetit të ri qeveritar në Shqipëri, i prezantuar një ditë më parë nga kryeministri Edi Rama, janë gra.

Në një raport të publikuar disa muaj më parë nga ‘Visual Capitalist’, mbështetur në të dhënat e Un Women dhe The Inter-Parlamentary Union, Shqipëria renditej mes 10 vendeve me më shumë gra në qeveri, konkretisht në vendin e nëntë me 53,3 për qind. Por, kabineti i ri, 80 për qind e të cilit do të drejtohet nga ministre gra, me gjasë e ndryshon këtë raport.

Qeveria Rama 2, ku ministrat ndryshuan disa herë, kishte së fundmi në përbërjen e vet 9 ministre gra dhe 7 ministra burra.

Por cilat janë vendet e botës me më shumë gra në qeveritë e tyre?

Raporti i ‘Visual Capitalist’ tregon se vetëm 14 vende të botës nga 195 të marra në shqyrtim kanë të paktën 50 për qind gra që mbajnë poste ministrore në qeveritë e tyre.

Sipas raportit, shtetet me më shumë gra në qeveri janë:

• Spanja, 66, 7 për qind
• Finlanda 61, 1 për qind
• Nikaragua 58, 8 për qind
• Kolumbia, 57, 9 për qind
• Austria 57, 1 për qind
• Peruja 55 për qind
• Suedia, 54, 9 për qind
• Ruanda 53, 6 për qind
• Shqipëria 53, 3 për qind
• Franca 52,9 për qind.

Në qeveritë e vendeve të Ballkanit gratë zënë një peshë të vogël të posteve ministrore. Konkretisht qeveria e Malit të Zi ka 22 për qind gra, Republika e Maqedonisë së Veriut 21, 7 për qind, Serbia 19,1 për qind, Kroacia 20 për qind.

Në listë ka edhe vendet me 0 për qind gra në qeveri si Arabia Saudite, Brunei, Vietnami, Papua New Guinea, Tailanda dhe disa shtete të vogla.

LEXONI GJITHASHTU:

• Kush janë ministrat e rinj në qeverinë Rama 3
• 5 ministrat e rinj në kabinetin qeveritar ‘Rama 3’