Cilat vende mund të jenë në shënjestër të Trump pas Venezuelës?

Mandati i dytë i Presidentit të SHBA-së, Donald Trump, po shfaqet i karakterizuar nga ambiciet e tij në politikën e jashtme. Ai ka ekzekutuar kërcënimet ndaj Venezuelës duke arrestuar presidentin dhe gruan e tij në kompleksin e fortifikuar të Karakasit, në një operacion dramatik gjatë natës.

Duke përshkruar këtë operacion, Trump hodhi poshtë Doktrinën Monroe të vitit 1823 dhe supremacinë tradicionale të SHBA-së në hemisferën perëndimore, duke e riemëruar atë si “Doktrina Donroe”.

Ja disa nga paralajmërimet që ai ka bërë kohët e fundit për vende të tjera në orbitën e Uashingtonit:

Groenlandë
SHBA-të kanë tashmë Bazën Hapësinore Pituffik në Groenlandë, por Trump kërkon të marrë kontrollin e të gjithë ishullit. “Ne kemi nevojë për Groenlandën nga pikëpamja e sigurisë kombëtare,” tha ai, duke theksuar praninë e anijeve ruse dhe kineze në rajon.

Ishulli, pjesë e Mbretërisë së Danimarkës dhe i pasur me minerale të rralla të tokës, ka një vendndodhje strategjike në Atlantikun e Veriut dhe mund të ofrojë rrugë të reja transporti detar pasi akujt polarë të shkrihen. Kryeministri i Groenlandës, Jens Frederik Nielsen, e quajti idenë e kontrollit amerikan “një fantazi” dhe theksoi rëndësinë e respektimit të së drejtës ndërkombëtare.

Kolumbia
Vetëm disa orë pas operacionit në Venezuelë, Trump paralajmëroi presidentin kolumbian Gustavo Petro të “kishte kujdes”. Kolumbia ka rezerva të mëdha nafte, minerale dhe është qendër e tregtisë së drogës, veçanërisht kokainës. SHBA-të vendosën sanksione ndaj Petros në tetor, duke akuzuar qeverinë e tij për lehtësimin e aktiviteteve të kartelëve. Trump deklaroi se Kolumbia po drejtohej nga “një njeri që prodhon dhe shet kokainë në SHBA” dhe sugjeroi mundësinë e ndërhyrjes amerikane.

Irani
Trump ka paralajmëruar autoritetet iraniane për të mos shtypur protestat antiqeveritare, duke thënë se çdo dhunë ndaj protestuesve do të “goditej rëndë” nga SHBA-të. Megjithëse Irani nuk bën pjesë në hemisferën e Doktrinës Donroe, Trump ka kërcënuar më parë regjimin iranian, pas sulmeve ndaj objektivave bërthamore dhe tensioneve të fundit me Izraelin.

Meksikë
Trump ka kritikuar vazhdimisht autoritetet meksikane për mungesë veprimi ndaj trafikut të drogës dhe emigracionit të paligjshëm. Në ditën e tij të parë të rikthimit në detyrë, ai riemëroi Gjirin e Meksikës në “Gjiri i Amerikës” dhe paralajmëroi nevojën për masa kundër karteleve të drogës. Presidentja e Meksikës, Claudia Sheinbaum, ka hedhur poshtë çdo ndërhyrje ushtarake të mundshme amerikane.

Kuba
Kuba, vetëm 145 km në jug të Floridës, ka qenë nën sanksione amerikane që nga vitet 1960 dhe ka pasur lidhje të ngushta me Venezuelën. Trump sugjeroi se ndërhyrja ushtarake nuk është e nevojshme, duke vlerësuar se vendi po përballet me vështirësi ekonomike pas rënies së furnizimit nga Venezuela. Sekretari i Shtetit, Marco Rubio, ka bërë thirrje për ndryshim regjimi në Kubë, duke theksuar rëndësinë e situatës për SHBA-të./BBC