LIVE| Përplasje të forta para Parlamentit, protestuesit qëllojnë me vezë makinat e deputetëve, policia arreston Dritan Goxhajn

Protestuesit kanë lënë ambientet e Parlamentit nga ku situata pati përplasje fizike, hedhje të mjeteve piroteknike.

Tashmë protestuesit po marshojnë drejt Drejtorisë së Policisë duke vazhduar me thirrjet e tyre.

Punonjësit e policisë kanë arrestuar disa persona për shkak të këtyre incidenteve, nderkohë qytetarët të shoqëruar nga forcat e policisë janë nisur drejt Drejtorisë Vendore të Policisë.

Ka degraduar në dhunë dhe përplasje fizike protesta që po zhvillohet mesditën e sotme përpara Parlamentit. Krahas sulmeve me vezë dhe shishe uji ndaj makinave të deputetëve, situata është tensionuar edhe më tej pas përdorimit të lëndëve të rrezikshme piroteknike ndaj forcave të rendit.

Gjatë përplasjes së ashpër mes turmës dhe efektivëve të policisë, protestuesit kanë hedhur në drejtim të kordonit të sigurisë mjete piroteknike mjaft të forta. Këto shpërthime kanë krijuar panik në terren.

Në këto kushte, policia ka nisur menjëherë operacionin për identifikimin dhe kapjen e personave që hodhën këto mjete të forta piroteknike në mes të kordonit policor.

Është tensionuar sërish në protestën që po zhvillohet para Parlamentit teksa policia na ndërhyrë për t’i shpërndarë dhe për të hapur hyrjen e parlamentit.

Policia ka shoqëruar disa persona mes te cilëve Dritan Goxhajn, që njihet si nje nga organizatorët e protestës. Bashkë me të është prangosur edhe Shkëlzen Bushi një person gjithashtu shumë aktiv në protestë.

Janë shënuar sërish tensione përpara Parlamentit, këtë herë mes protestuesve dhe forcave të rendit e sigurisë. Ndërsa seanca plenare vijon brenda sallës, jashtë situata ka kaluar në konfrontim fizik.
Sipas pamjeve nga vendngjarja, vihet re një përplasje e ashpër fizike mes disa protestuesve dhe efektivëve të policisë pranë rrethimit të jashtëm të institucionit. Qytetarët kanë tentuar të shtyjnë kordonin policor, gjë që ka sjellë reagimin e menjëhershëm të forcave të rendit për t’i zmbrapsur.
Në momentin e përplasjes, situata është shoqëruar me tensione të larta verbale. Mes shtyrjeve dhe kaosit, dëgjohen qartë zërat e protestuesve, të cilët u bëjnë thirrje efektivëve të policisë të ndalojnë ndërhyrjen.

Deputeti i Partisë Socialiste, Tërmet Peçi, është përballur me thirrje dhe reagime nga protestuesit pas daljes nga ambientet e Kuvendit.
Disa protestues e ndjekin deputetin, duke i drejtuar akuza dhe thirrje të ndryshme si “Hajdut!”, “Analfabet!” dhe “Nuk na përfaqëson!”.
Deputeti socialist është ndjekur nga protestuesit nga dalja e Kuvendit deri në zonën e Unazës, pranë selisë së Partisë Demokratike, pa bërë asnjë reagim ndaj tyre.

Vijojnë të mbeten të larta tensionet përpara Parlamentit, ku po mbahet seanca plenare e radhës.
Vetëm pak minuta pasi protestuesit qëlluan me vezë automjetin e zëvendëskryeministres Albana Koçiu, shënjestër e sulmit është bërë edhe makina e ministrit të Turizmit, Kulturës dhe Sportit, Blendi Gonxhja.
Sipas pamjeve, situata paraqitet mjaft e tensionuar tek protestuesit, të cilët kanë qëlluar në drejtim të automjetit të ministrit Gonxhja jo vetëm me vezë, por edhe me shishe uji, ndërsa makina e ministrit është larguar me shpejtësi nga perimetri i Parlamentit.

Një situatë e tensionuar është regjistruar mesditën e së martës para Parlamentit ku automjeti i një ministri është goditur me vezë nga protestuesit sapo ka hyrë në Parlament.
Protestuesit janë përplasur me policinë që ka ndërhyrë për të hapur rrugën para parlamentit për të mundësuar kalimin e makinave që ishin të pranishëm në seancën plenare.
Në ndihmë të efektivëve të policisë kanë shkuar forca të FNSH të pajisur me skafandra dhe shkopinj gome.

Seanca e së martës në Kuvend është shoqëruar me debate të ashpra mes kryetarëve të grupeve parlamentare të Partisë Socialiste dhe Partisë Demokratike, lidhur me protestën që po zhvillohet prej një muaji në Tiranë.
Kreu i grupit parlamentar të PD-së, Gazment Bardhi, i kërkoi mazhorancës të anulonte koncertin e Kanye West, duke e cilësuar atë si simbol të antisemitizmit. Ai shtoi gjithashtu se nuk është e pranueshme që, sipas tij, mazhoranca “të japë leksione antisemitizmi për pjesëmarrësit në protestë”.
Në fjalën e tij, Bardhi iu drejtua kreut të grupit parlamentar të PS-së, Taulant Balla, duke deklaruar: “Ti që nuk di CV-në e Suel Çelës, me të cilin rrije 24 orë, di CV-në e çdo protestuesi”.
Balla tha se opozita është e “ekzaltuar” nga kjo protestë, pasi sipas tij, përmes saj shpreson të përfitojë politikisht dhe “të shpëtojë nga Sali Berisha”.
“Ju jeni më të ekzaltuarit, sepse nga kjo protestë shpresoni të shpëtoni nga Saliu”, u shpreh Balla