Çmimi ‘Sakharov’ për ukrainasit, PE vlerëson rezistencën ndaj pushtuesve rusë

Populli guximtar ukrainas është vlerësuar me çmimin Sakharov për Lirinë e Mendimit. Duke dorëzuar çmimin, Parlamenti Evropian ka ripërsëritur solidaritetin e tij me qytetarët ukrainas në luftën e tyre për liri dhe pavarësi. Liderë të zgjedhur të Ukrainës dhe përfaqësues të shoqërisë civile ishin të pranishëm në ceremoni.

“Kemi qenë dëshmitarë të rezistencës frymëzuese të qytetarëve të zakonshëm, që kanë sakrifikuar jetën për të ndalur kolonat e tankeve, që janë ngritur për t’u përballur me trupat ruse me krenarinë e tyre si armë. Kemi parë edhe gra që janë detyruar të lindin në stacionet e metrove. Mesazhi ynë për këta njerëz ka qenë i qartë: Ne jemi me Ukrainën”, tha Roberta Metsola, kryetare e Parlamentit Evropian.

Gjatë ceremonisë, presidenti ukrainas Volodymyr Zelensky kërkoi mbajtjen e një minute heshtjeje për ata qytetarë ukrainas që kanë humbur jetën në luftën përballë Rusisë. Ndërsa kryebashkiaku i qytetit të Melitopolit, i pranishëm në event, bëri këtë koment.

“Moska u përpoq të fuste në kokën e qytetarëve të zonave të pushtuara propagandën ruse. Ajo u tha atyre se Rusia është këtu përgjithmonë, se BE dhe institucionet evropiane ju kanë harruar, se nuk do të çliroheni kurrë. Por ky çmim tregon se vëmendja e institucioneve të BE-së ndaj qytetarëve tanë po shtohet, se ata nuk janë harruar nga askush”, u shpreh Ivan Fedorov.

Që kur Rusia pushtoi Ukrainën shkurtin e kaluar, miliona njerëz janë zhvendosur dhe dhjetëra mijëra janë vrarë ose plagosur. Por pavarësisht agresionit, populli ukrainas ka refuzuar të përkulet ndaj pushtuesve.

LEXONI GJITHASHTU:

• Kremlini: S’kemi marrë propozim nga Ukraina për armëpushim gjatë Krishtlindjeve
• 64 ukrainas dhe një amerikan lirohen pas shkëmbimit me të burgosur rusë