“Copa America”, Brazili kalon në gjysmëfinale duke mundur Kilin

Brazili siguroi gjysmëfinalet e Kupës së Amerikës (Copa America) duke mundur 1-0 Kilin në “Estadio Olimpico Nilton Santos” të Rio De Zhaneiros.

Përfaqësuesja e trajnerit Tite iu fal golit të Lucas Paqueta në fillim të pjesës së dytë, ndërsa më pas e pa veten në vështirësi kur Gabriel Jesus u ndëshkua me karton të kuq.

Kili përfitoi nga diferenca numerike dhe realizoi barazimin në minutën e 62-të, mirëpo realizimi i Edu Vargas rezultoi në pozicion jashtë loje, gjë që u gjykua falë video-asistencës (VAR).

Pavarësisht përpjekjeve në fund Brazili e ruajti rezultatin dhe kështu shkon në gjysmë-finale ku përballë, më 6 korrik, do të ketë Perunë. Kjo e fundit mposhti 4-3 Paraguain.

“Copa America” zhvillohet në Brazil këtë vit pas problemeve që hasi Kolumbia apo dhe Argjentina si vende organizatore. Përfaqësuesja e Neymarit synon të mbrojë titullin kampion, të cilin e fitoi në vitin 2019.

Brazilianët e kanë fituar 9 herë këtë trofe dhe mbeten pas Uruguait (15) dhe Argjentinës (14). Këto të fundit mund të përballen me njëra-tjetrën në gjysmëfinale nëse mposhtin Ekuadorin dhe Kolumbinë në ndeshjet e radhës.