Darmanen: Franca parandaloi 2 komplote për sulm terrorist në Lojërat Olimpike 

Franca ka shkatërruar dy komplote të veçanta për një sulm terrorist gjatë Lojërave Olimpike, njoftoi sot ministri i Brendshëm Gerald Darmanen. Ai tha se policia ka bërë “disa arrestime” në dy operacione të ndara.

“Kjo nuk u njoftua në ditët e kaluara për shkak të fushatës zgjedhore, por ne kemi arrestuar njerëz që dyshojmë se po planifikonin sulme terrorist”, tha Darmanen në një intervistë për kanalin francez të lajmeve BFM TV.

Përpara Ditës së Bastiljes më 14 korrik dhe Lojërave Olimpike më 26 korrik, ministri shtoi se kërcënimi terrorist në Francë është ende i lartë.

Franca ka qenë në alarmin më të lartë terrorist që nga marsi, pas sulmit në sallën “Crocus” të Moskës në të cilin vdiqën 145 persona dhe Shteti Islamik mori përgjegjësinë për sulmin. Pas atij sulmi, Darmanen vendosi ta vinte Francën në gatishmërinë më të lartë kundër sulmeve terroriste.

Përveç sfidave të sigurisë të Lojërave Olimpike dhe ceremonisë së hapjes, e cila do të mbahet në lumin Seine, zgjedhjet e parakohshme parlamentare kanë ngritur frikën për trazira civile dhe protesta masive. Të dielën e 7 korrikut do të mbahet raundi i dytë i zgjedhjeve parlamentare, në të cilat parashikohet që partia e djathtë “Mbledhja Kombëtare” të marrë mundësinë për të formuar qeverinë.

Për sigurinë e zgjedhjeve, rreth 30,000 policë do të vendosen në të gjithë vendin, nga të cilët 5,000 do të vendosen në Paris.