Deklaratat kundër Thaçit dhe Veselit, aktivistët shkruajnë UÇK mbi makinën e zv.kryeministres Gërvalla

Disa deklarata që Donika Gërvalla, sot zv.kryeministre dhe ministre e Punëve të Jashtme, ka bërë në vitin 2019 dhe 2020, ku sulmonte luftëtarët e arrestuar të UÇK-së, ka nxitur mjaft reagime.

Sot aktivistë të Partisë Socialdemokrate në Kosovë kanë shkruar UÇK mbi makinën e zv.kryeministres si kundërpërgjigje ndaj qëndrimit të saj ku i cilësonte Hashim Thaçin dhe Kadri Veselin “koka të krimit” ndërsa Rexhep Selimin, ish-deputetin e VV-së e quante “kriminel”.

Reagimet e shumta të opinionit publik detyruar dhe kryeministrin, Albin Kurti që t’i dalë në mbrojte zëvendëses së tij.

Kreu i qeverisë së Kosovës e cilëson “fushatë kundër zëvendëses sime dhe ministres së MPJD, znj. Donika Gërvalla, me tezën se ajo nuk e respekton UÇK-në”.

E gjitha kjo sipas z. Kurti nuk ndodhi kur “znj. Gërvalla erdhi në listën tonë zgjedhore e as kur u emërua ministre, por tash që u kthye nga vizita e suksesshme në Bruksel”.

Kryeministri i Kosovës e mbyll reagimin e tij në Facebook duke thënë se, “znj. Gërvalla e mbron dhe e afirmon luftën tonë çlirimtare dhe UÇK-në. Në takimet me ndërkombëtarë, ajo e shpjegon agresionin dhe krimet e Serbisë gjatë luftës në Kosovë si pakkush tjetër.”