Delegacioni i BE-së reagon ndaj pretendimit të Aleancës për Teatrin se ambasadori Soreca ndikoi tek “Kushtetuesja”

Delegacioni i BE-së në Shqipëri ka reaguar në lidhje me deklaratën e Aleancës për Mbrojtjen e Teatrit, përmes të cilës kërkohen shpjegime mbi një vizitë të ambasadorit të Bashkimit Evropian në Shqipëri, Luigi Soreca ditën e seancës për çështjen e teatrit.

Shpjegimet nga ana e aleancës janë kërkuar edhe për temën e diskutimit në takimin me kryetaren e Gjykatës Kushtetuese, Vitore Tusha, si dhe paralajmërohet nisja e procedurave për shpalljen “non grata” të ambasadorit.

Ndërkohë, Delegacionit Europian i ka konsideruar si shpifje këto pretendime të aleancës për temën e diskutimit dhe nëpërmjet një postimi në Twitter, sqaroi se deklarata e Aleancës për Mbrojtjen e Teatrit Kombëtar nuk është e bazuar në të dhëna të vërteta dhe se gjatë takimit nuk pati asnjë diskutim në lidhje me çështjen e hapur në Gjykatë mbi Teatrin Kombëtar.

“Delegacioni i BE-së në Shqipëri përgënjeshtron me forcë deklaratat bazuar në shpifje prej një përfaqësueseje të Aleancës për Mbrojtjen e Teatrit Kombëtar”, deklaroi Delegacioni i BE-së në Shqipëri, duke shtuar se “Delegacioni i BE-së në Shqipëri dhe Ambasadori Soreca vazhdojnë të mbështesin fuqimisht dhe në mënyrë sistemike pavarësinë e të gjitha institucioneve gjyqësore shqiptare”.

LEXONI GJITHASHTU:

• Gjykata Kushtetuese shtyn për nesër seancën për çështjen e teatrit
• Roland Lami: Shkarkimi i Metës nga Gjykata Kushtetuese do t’i njolloste biografinë politike