Dëmtimi i monumentit në Apoloni, Presidenti Meta: Akt barbar

Presidenti, Ilir Meta ka dënuar shkatërrimin e një prej monumenteve në Parkun Arkeologjik Kombëtar të Apolonisë, duke e cilësuar akt barbar dhe antikombëtar. Duke e krahasuar me shembjen e Teatrit Kombëtar, Meta thotë se çdo sulm që dëmton trashëgimin është sulm ndaj identitetit tonë kombëtar.

“Thellësisht i tronditur nga kjo ngjarje tepër e rëndë, apeloj me forcë nisjen e një hetimi të menjëhershëm dhe vënien para përgjegjësive ligjore të autorëve dhe frymëzuesve të tyre, të cilët duhet të marrin një dënim shembullor. Çdo sulm ndaj trashëgimisë dhe vlerave tona kombëtare, sikundër ndodhi edhe me shembjen e Teatrit Kombëtar, është sulm i drejtpërdrejt ndaj identitetit tonë kombëtar”, shprehet Meta.

“Bëj thirrje për nisjen pa zvarritje të projektit të restaurimit dhe forcimin e masave për mbrojtjen e monumenteve të kulturës në të gjithë vendin, që rastet e fundit dëshmojnë se po rrezikohen nga akte barbare që as pushtuesit nuk kanë guxuar t’i bëjnë. Barbaria dhe talebanizmi nuk kanë vend në shoqërinë tonë”, përfundon Presidenti.