Aksi rrugor Borsh-Sarandë është dëmtuar nga reshjet fundit të shiut, një pjesë e saj ka rrëshqitur duke bërë që kalimi në këtë aks të bëhet vetëm në një korsi.

Kjo pjesë e dëmtuar është restauruar vetëm një vit më parë por si gjatë restaurimin ashtu edhe gjatë ndërtimit të saj përpara 13 vitesh, banorët shprehen se nuk janë marrë parasysh burimet e shumta ujore në këtë zonë.

Në pjesën e dëmtuar kanë shkuar përfaqësues të Autoritetit Rrugor Shqiptar të cilët shprehen se po punohet për të ndalur më tej dëmtimin e rrugës për shkak të rrëshqitjes së saj.

Sipas drejtorit të ARRSH-së Ergys Verdho ky është një aks problematik dhe prej një viti është gati një projekt për t’i dhënë zgjidhje kësaj situate.

Kompania Salillari, e cila ka përgjegjësinë e mirëmbajtjes së këtij aksi, një vit më parë ka ri-asfaltuar pjesën e dëmtuar por nuk ka kryer punime për të shmangur dëmtimin e mëtejshëm megjithëse edhe para një viti kjo çarje kishte dhënë shenjat e para.