Demush Shasha: Kancelarja Merkel vendosi vijën e kuqe për shkëmbimin e territoreve

Demush Shasha, Drejtori i Institutit EPIK vlerësoi rolin që kancelarja e Gjermanisë, Angela Merkel ka luajtur në Ballkanin Perëndimor.

Gjatë intervistës në Euronews Albania, z. Shasha thotë se Merkel është politikania, e cila vendosi vijën e kuqe kundër ndarjes së territoreve.

“Marrëdhëniet Kosovë-Serbi janë më normale se para dhjetë vitesh.  Në kuptimin e shkëmbimit të territoreve, ajo është ndoshta një pikë ku zonja Merkel ka qenë jashtëzakonisht e prerë. Dhe mund të them tani me atë çfarë kemi kuptuar se znj. Merkel ka qenë ndoshta personi i vetëm dhe kryesor, që i ka dalë në rrugë asaj iniciative dhe po të mos kishte qene ajo ndoshta sot mund të kishim realitet tjetër. Në këtë kuptim, ka qenë një vije e kuqe, të cilin ajo nuk e ka lejuar të kalohet asnjëherë”, tha ai.

Ideja për shkëmbimin e territoreve mes Kosovës dhe Serbisë prodhoi debate në sferën politike në Ballkan, por edhe në Evropë. Kjo ide është cilësuar si e gabuar dhe e dëmshme për stabilitetin në këtë rajon.