Apeli cakton datën e dhënies së vendimit për Saimir Tahirin

Gjykata e Posaçme e Apelit për Korrupsionin dhe Krimin e Organizuar ka caktuar 24 qershorin, si datë për dhënien e vendimit ndaj ish-ministrit të Brendshëm, Saimir Tahiri dhe ish-drejtorit të Policisë së Vlorës, Jaeld Çela. Seanca ka zgjatur rreth 6 orë, ku palët kanë paraqitur argumentet e tyre. Nga një anë ish-ministri pretendon pafajësinë, kurse Prokuroria i qëndron pretencës së paraqitur në shkallën e parë, ku kërkoi 8 vite heqje lirie me akuzën e trafikimit të drogës dhe grupit të struktura kriminal. Akuza të cilat janë ngritur dhe ndaj Çelës.

Mbrojtja para gjykatës është bërë nga vetë Tahiri, duke akuzuar dhe prokurorinë për sajesë faktesh dhe vendimin e shkallës së parë e ka cilësuar dënim me akuzë të paqenë dhe pretenduar se e ka shtrua detyrën e tij plotësisht në përputhje me ligjin. Tahiri, pasi e ka cilësuar gjyqin ndaj tij si komedi, ka theksuar se do të pranojë çdo vendim gjyqësor. Në fund, ai ka bërë dhe një deklaratë politike duke thënë se “Saimir Tahiri ende nuk ka ikur”.

“Nuk kam folur gjatë për të respektuar drejtësinë. Jam i vetmi që kam lënë mandatin e deputetit për t’u përballur si qytetar dhe jo si deputet, mund të më shikonit çdo të enjte në Parlament të bëjë ndonjë rrëmujë dhe të vija prap këtu, siç kanë bërë të gjithë të tjerë para meje. E kam bërë detyrën shumë më mirë nga këta që janë dhe nga ata që ishin”, tha Tahiri.

Vendimi i formës së prerë dhe është i zbatueshëm menjëherë. Më pas mbetet shkalla e fundit në Gjykatën e Lartë, ku palët mund të kërkojnë rekurs. Që prej fundit të vitit 2017-të, ish-ministri Tahiri është akuzuar se në bashkëpunim me Çelën kanë ndihmuar grupin e Habilajve për të trafikuar drogë. Në vitin 2019 ish-Ministri u dënua me 5 vite burg vetëm për shpërdorim detyre, por ky dënim u kthye në 3 vite e 4 muaj shërbim prove.

Ish-drejtori i policisë Vlorë, Çela, u dënua gjithashtu për shpërdorim detyre 3 vite e 4 muaj, por ndryshe nga Tahiri ai nuk përfitoi konvertim të dënimit me burg, pasi ishte arratisur. Më 16 maj ai u dorëzua pas pothuajse 3 vitesh arrati, por më 19 maj Gjykata la ndaj tij masën e arrestit me burg. Vendimi u apelua nga Prokuroria, por dhe nga vetë ish-ministri i Brendshëm që kërkon pafajësinë.