Dënohen bashkëpunëtorët e Millosheviç, Kurti: Serbia duhet të pranojë të vërtetën dhe të kërkojë falje

Kryeministri i Kosovës, Albin Kurti reagoi pas vendimit të Gjykatës së Kombeve të Bashkuara në Hagë, që dënoi me nga 12 vjet burgim ish-krerët e sigurimit shtetëror serb gjatë regjimit të Millosheviçit.

Kurti shprehet se strukturat e drejtuara nga këta persona kryen gjenocid edhe në Kosovë. Sipas tij, Serbia duhet të pranojë të vërtetën dhe të kërkojë falje, si e vetmja rrugë për të nisur pajtimin e dy vendeve.

“Serbia sot duhet të përballet me të kaluarën e saj, të pranojë të vërtetën, të kërkojë falje dhe të distancohet nga Serbia e Millosheviçit. Vetëm atëherë mund të fillojë pajtimi”, – shprehet Kurti.

Gjykata e Kombeve të Bashkuara në Hagë dënoi me nga 12 vjet burg dy nga bashkëpunëtorët e ngushtë të ish-presidentit serb, Jovica Stanishiç, 70 vjeç, ish-shef i shërbimit të sigurimit shtetëror të Serbisë, dhe zëvendësi i tij, Franko Simatoviç, 71 vjeç.

Ata u akuzuan për udhëheqje të grupeve paraushtarake gjatë luftërave në ish-Jugosllavi, në vitet 1990. Fillimisht, Gjykata e Hagës liroi Stanishiçin dhe Simatoviçin nga akuzat për krime lufte dhe krime kundër njerëzimit në vitin 2013. Por, çështja u rihap në vitin 2015 pas protestave dhe apelit të prokurorëve.

Dy të dënuarit e Hagës kanë qenë bashkëpunëtorë të ngushtë të ish-presidentit serb, Sllobodan Millosheviç, i cili njihet si ‘kasapi i Ballkanit’.

LEXONI GJITHASHTU:

• Gjykata e Hagës dënon me burg ish-bashkëpunëtorët e Sllobodan Millosheviç
• Vjosa Osmani: Serbia vijon me mendësinë e Millosheviçit ndërsa dialogu ka rrëshqitur në çështje të brendshme