GJKKO vendos 1 vit burg për Zamira Ramin, i konvertohet në punë me interes publik

Ish-kryetarja e bashkisë Gjirokastër, Zamira Rami u shpall fajtore dhe u dënua me një vit burg për shpërdorim detyre.

Por, ekzekutimi i dënimit me burg do të pezullohet, pasi do i konvertohet me detyrimin për të kryer punë në interes publik.

“Në bazë të nenit 63 të Kodit Penal urdhërohet pezullimi i ekzekutimit të vendimit me burgim dhe zëvendësimin e tij me detyrimin që e dënuara Zamira Rami të përmbushë një punë në interes publik prej 120 orë, duke u kryer kjo punë brenda afatit prej 6 muajsh, me kushtin që e pandehura të respektojë parashikimet e nenit 62 të Kodit Penal dhe të mbajë kontakte me Zyrën Vendore të Shërbimit të provës në Gjirokastër”, thuhet në vendimin e gjykatës.

Ishte, Struktura e Posaçme Anti-Korrupsion (SPAK) që dërgoi për gjykim çështjen ndaj Ramit e cila, u padit në vitin 2019 nga familjet Sako dhe Xhai në Gjirokastër për prishje të paligjshme të shtëpive të tyre gjatë dy projekteve të rikualifikimit urban në qytet.

Familjet u ankuan pasi ndaj tyre nuk kishte pasur procedura shpronësimi. Pas shqyrtimeve të pretendimeve, SPAK tha se ishte shkaktuar një dëm prej 5.6 milionë lekë.

LEXONI GJITHASHTU:

• Gjykata e Posaçme pranon të shqyrtojë akuzat për shpërdorim detyre ndaj ish-kryebashkiakes së Gjirokastrës
• SPAK dërgon për gjykim ish-kryetaren e Bashkisë Gjirokastër Zamira Rami