‘Dialog për njohjen respektive’, i nominuari për ambasador të SHBA flet për negociatat Kosovë-Serbi

Dialogu mes Kosovës dhe Serbisë duhet të ketë në qendër njohjen respektive. Ka qenë ky qëndrimi i të nominuarit të presidentit të Shteteve të Bashkuara, Joe Biden për ambasador në Kosovë, Jeffrey Hovenier në Komitetin e Senatit amerikan për Marrëdhënie me Jashtë,

“Normalizimi i marrëdhënieve është thelbësor për stabilitetin rajonal dhe do të hapë rrugën për dy shtetet drejt integrimeve në institucionet euro-atlantike. Ne e pranojmë se Serbia dëshiron të mbështesë komunitetin serb në Kosovë, kjo është e arsyeshme. Mirëpo kjo gjë duhet bërë brenda kornizës kushtetuese dhe sipas ligjeve të Kosovës”, ka thënë i nominuari për ambasador në Kosovë.

Në prezantimin e tij, Hovenier ka thënë se do të mbështesë zhvillimin gradual dhe transparent të Forcës së Sigurisë së Kosovës.

“Në periudhë afatshkurtër, mendoj se detyra jonë është që të inkurajojmë autoritetet e Kosovës që të bëjnë reformat e kërkuara, në mënyrë që të jenë të gatshme për anëtarësim në Bashkimin Evropian dhe në NATO”, mësohet të ketë thënë ai.

Hovenier ka shtuar edhe se do të inkurajojë edhe vendet e BE-së që nuk kanë njohur shtetësinë e Kosovës; Spanjën, Sllovakinë, Qipron, Rumaninë dhe Greqinë për të menduar rreth ndikimit që mund të ketë kjo gjë në procesin e anëtarësimit.