Dialogu Kosovë-Serbi, Ardita Sinani: E domosdoshme që çështja e Luginës së Preshevës të trajtohet në atë tryezë

Ardita Sinani, kryetare e komunës së Preshevës u shpreh në Euronews Albania se çështja e Luginës së Preshevës duhet të trajtohet me rëndësi në tryezën e bisedimeve mes Kosovës dhe Serbisë.

“Ne përfaqësuesit politikë të Luginës së Preshevës ka kohë që kërkojmë që tema dhe çështja e Luginës së Preshevës duhet të trajtohet seriozisht dhe insistojmë që të jetë në tryezën e bisedimeve në fazën finale të dialogut Kosovë-Serbi”, u shpreh znj. Sinani.

“Është e domosdoshme që çështja e Luginës së Preshevës të trajtohet në atë tryezë”, shtoi ajo.

Kryetarja e Komunës Preshevës tha se nuk mund të përcaktojnë agjendën e takimit, por duhet të jenë në koordinim edhe qeverinë e Prishtinës për kërkesat e tyre.

“Ne nuk përcaktojmë agjendën, nuk përcaktojmë se kush të shkojë dhe çfarë të flasë, por prioritet është që çështja e Luginës së Preshevës të trajtohet seriozisht dhe të jemi të koordinuar, në bashkëveprim mes Prishtinës zyrtare dhe përfaqësuesve të zgjedhur të Luginës së Preshevës”, tha ajo.

Znj. Sinani foli edhe për situatën ekonomike, politike apo shoqërore në të cilën ndodhen qytetarët e Preshevës, ku tha se shkalla e diskriminimit nga pushteti qendror është jashtëzakonisht shumë e lartë.

LEXONI GJITHASHTU:

Shqiptarët e Luginës së Preshevës kërkojnë që të jenë pjesë e dialogut Kosovë-Serbi