Dialogu Kosovë-Serbi, palët akuzojnë njëra-tjetrën për moszbatim të marrëveshjeve

Për dy ditë radhazi në Bruksel u takuan delegacionet e Kosovës dhe Serbisë me të ngarkuarin e Bashkimit Evropian në dialogun Kosovë-Serbi, Mirosllav Lajçak, por nuk u shënua asnjë përparim.

Të dyja palët akuzuan njëra-tjetrën për moszbatim të marrëveshjeve të deritashme.

Pala kosovare e kryesuar nga zëvendëskryeministri i Kosovës, Besnik Bislimi, që është i ngarkuar me çështjen e dialogut, tha “se pala serbe nuk i ka përmbushur detyrimet e saj ndaj marrëveshjeve”.

Nga ana tjetër, edhe pala serbe e kryesuar nga drejtori i Zyrës për Kosovën në qeverinë e Serbisë, Petar Petkovic, deklaroi se pala kosovare gjatë bisedimeve asnjëherë nuk e përmendi çështjen e të zhdukurve ose formimin e Asociacionit të Komunave me shumicë serbe.

Takimet e delegacioneve kosovare dhe serbe në Bruksel janë parapërgatitje për takimin e radhës të nivelit të lartë ndërmjet Albin Kurtit dhe Aleksandër Vuçiç-it që pritet të zhvillohet në fund të korrikut.

LEXONI GJITHASHTU:

• Marrëveshja e Uashingtonit shkakton debat mes Kurtit dhe Hotit
• Marrëveshja e Uashingtonit, Kosova dhe Serbia nuk shfaqin interes për ta zbatuar
• Hoti paralajmëron Kurtin: Zbato marrëveshjen e Uashingtonit, përndryshe nuk e ke të gjatë në qeveri