Dialogu mes Kosovës dhe Serbisë, Borrell: Bashkëpunimi i fortë BE-SHBA do të ndihmojë palët

Përfaqësuesi i Lartë i Bashkimit Europian, Josep Borrell informoi një ditë më parë ministrat e Punëve të Jashtme të vendeve të BE-së mbi raundin e fundit të dialogut Kosovë-Serbi të zhvilluar një javë më parë në Bruksel, ku të pranishëm ishin kryeministri, Albin Kurti dhe presidenti serb, Aleksandër Vuçiç.

Shefi i Diplomacisë vlerësoi se bashkëpunimi i zgjeruar dhe i fortë me Shtetet e Bashkuara dhe Bashkimin Europian do të ndihmojë procesin e dialogut midis Kosovës dhe Serbisë.

“Bashkëpunimi midis SHBA-së dhe BE-së është shumë i mirë dhe nuk ka më konkurrencë nga përpjekjet amerikane për të marrë rolin kryesor në dialogun Beograd-Prishtinë”, – u shpreh Borrell.

Duke përmbledhur takimin e fundit të takimit të ministrave të Jashtëm të BE-së në Luksemburg, ai shtoi se dialogu mbetet nën kujdesin e Bashkimit Europian. Borrell informoi ministrat se një raund i ri i dialogut pritej në korrik.

Bisedimet Kosovë-Serbi dhe synimi që vendet të arrijnë një marrëveshje ligjërisht detyruese për të dyja palët, është në mesin e 36 pikave të agjendës për politikë të jashtme të përbashkët, për të cilën u ra dakord një javë më parë gjatë takimit në Bruksel mes presidentit Joe Biden dhe liderëve të BE-së.

Të martën, gjatë ditës së dytë të takimit të ministrave të Jashtëm të Bashkimit Europian, do të diskutohet “konferenca ndërqeveritare Serbi-BE, por blloku nuk do të hapë ndonjë kapitull të ri në bisedimet e pranimit me Beogradin”.

Po ashtu, ministrat nuk pritet të miratojnë fillimin e bisedimeve të pranimit me Shqipërinë dhe Maqedoninë e Veriut të martën, pavarësisht se disa shtete anëtare i mbështesnin.

LEXONI GJITHASHTU:

• Dialogu Kosovë-Serbi në takimin e ministrave të Jashtëm të BE, Borrell informon për takimin Kurti-Vuçiç
• Agjenda e dialogut pritet të hartohet para takimit të radhës Kurti-Vuçiç