Diaspora shqiptare, boshnjake e malazeze letër Joe Biden për sigurinë në Ballkan

Përfaqësues të diasporave shqiptare, boshnjake dhe malazeze në SHBA i kanë dërguar një letër përfaqësuesve të Kongresit Amerikan dhe administratës së presidentit Joe Biden, ku shprehin shqetësimin për veprimet e Serbisë dhe bëjnë thirrje për angazhim më të madh të SHBA për të ruajtur paqen e sigurinë në Ballkan.

Në letër shprehet shqetësimi i komuniteteve në lidhje me rritjen e militantizmit të qeverisë së Serbisë ndaj Kosovës, por gjithashtu, gjithnjë e më shumë, ndaj Bosnje-Hercegovinës dhe Malit të Zi.

Përfaqësuesit e diasporave vlerësojnë se kjo përbën një çështje shqetësuese për SHBA-në, sepse rrezikon drejtpërdrejt paqen dhe stabilitetin e rajonit të Ballkanit perëndimor dhe paqen në Evrope në tërësi.