Dita e Baballarëve, aktivitete të shumta në Tiranë

19 qershori shënon Ditën e Baballarëve.

Me rastin e kësaj feste, Fondi i Kombeve të Bashkuara për Popullsinë në Shqipëri, (UNFPA Albania) ka ftuar të gjithë baballarët dhe familjet që të argëtohen dhe festojnë në Parkun Rinia në Tiranë.

Aktivitete të shumta u zhvilluan në orën 10:00 – 12:00 dhe do të ketë sërish në orën 18:30 – 20:30.

Hapja e aktivitetit në orën 10:00, u bë nga përfaqësuesi i Agjencisë Austriake për Zhvillim dhe Kryetari i Bashkisë, Erion Veliaj.

Qëllimi i aktivitetit, është vlerësimi dhe rëndësia e përfshirjes së baballarëve në kujdesin për familjen,  edukimin, argëtimin e fëmijëve dhe në ndarjen e balancuar të punëve të shtëpisë.

Ky aktivitet, vjen si bashkëpunim me disa kompani, ndër të cilat është edhe Euronews Albania.

Ndërsa, partneriteti është pjesë e projektit rajonal “Më shumë Zgjedhje: Politikat Familjare të Përgjegjshme Gjinore për Sektorin Privat në Ballkanin Perëndimor dhe Moldavi”, drejtuar nga UNFPA Eastern Europe & Central Asia me mbështetjen financiare të Austrian Development.

Më 22 qershor, ambasadori austriak Christian Steiner  do të jetë i pranishëm në mjediset e Euronews Albania, ku në orën 09:30 do të zhvillojë një intervistë.

Më pas, në 10:45 do të fillojë ceremonia e firmosjes së bashkëpunimit për politikat pro-familjes.