Dita e çlirimit të Kosovës, sot 22 vite nga ndërhyrja e trupave të NATO-s

Krerët e institucioneve të Kosovës zhvilluan homazhe në Prishtinë te Pllaka Përkujtimore e ushtarëve të rënë të NATO-s, në 22 vjetorin e hyrjes së trupave të NATO-s në Kosovë.

Ndërhyrja e NATO-s, më 12 qershor, 1999, pasoi fushatën e sulmeve ajrore të Aleancës Veri-Atlantike kundër ushtrisë serbe.

Kjo ditë, shënohet edhe si Dita e Lirisë apo Çlirimit të Kosovës. Presidentja e Kosovës, Vjosa Osmani tha se hyrja e forcave të NATO-s së bashku me Ushtrinë Çlirimtare të Kosovës i sollën vendit lirinë, çlirimin dhe paqen.

Ndërsa kryeministri, Albin Kurti tha se në qershorin e vitit 1999 këmbësoria e NATO-s iu bashkua ndërhyrjes ajrore kundër Jugosllavisë së Millosheviçit për të ndaluar gjenocidin kundër popullit shqiptar.

Zëvendëskomandanti i KFOR-it, nënvizoi se KFOR do të qëndroj në Kosovë për aq sa do të jetë e nevojshme për të siguruar paqe për të gjitha grupet etnike në Kosovë.

LEXONI GJITHASHTU:

Bashkimi Evropian njofton zyrtarisht takimin mes Albin Kurtit dhe Aleksandër Vuçiç

Takimi Kurti-Vuçiç, Petkoviç: Serbia gati për dialog, njohja e ndërsjellë nuk është aspak temë

Caktohet takimi Kurti-Vuçiç, zëdhënësi i BE-së Stano: Presim përkushtim