“Do avancojmë fuqinë bërthamore”- Putin: Garanci për mbrojtjen e Rusisë

Presidenti rus Vladimir Putin ka përdorur tone të ashpra ndaj Perëndimit. Pasi u shpreh i hapur për rishikimin e doktrinës bërthamore ruse, me një ulje të pragut për përdorimin e armëve atomike, Putin ka njoftuar se ka në program zhvillimin e mëtejshëm të fuqisë bërthamore, me raketa të qëlluara nga toka, deti dhe ajri, si garanci për mbrojtjen strategjike të Rusisë dhe për të mbrojtur ekuilibrat e pushtetit në botë.

Megjithatë, përmes zëdhënësit të tij Dmitry Peskov, Putin ka lënë të kuptohet se është i hapur edhe për të nisur bisedime strategjike me Shtetet e Bashkuara dhe Evropën për t’i trajtuar problemet e shumta të sigurisë globale në tryezë.

“Megjithatë, këto bisedime duhet të jenë gjithëpërfshirëse dhe të marrin parasysh situatën e Ukrainës dhe rolin e amerikanëve në konflikt”, ka shtuar Peskov.

Ndërkohë, në kuadër të luftës së re të ftohtë mes Shteteve të Bashkuara dhe Rusisë ka ardhur edhe vendimi i Uashingtonit për të ndaluar përdorimin e software-it të njohur rus kundër viruseve elektronike, “Kaspersky”, duke e akuzuar kompaninë se është e lidhur me autoritetet e Moskës.

Administrata amerikane ka vendosur sanksione ndaj 12 drejtuesve të kompanisë, e cila është përgjigjur me një notë proteste, duke deklaruar se vendimi është marrë në bazë të klimës aktuale gjeopolitike dhe për shkak të frikës hipotetike dhe që shkon në avantazh të kriminalitetit informatik.

LEXO GJITHASHTU:

• Putin: Po konsiderojmë mundësinë për ndryshime në doktrinën bërthamore të Rusisë
• Putin nënshkruan dhjetëra marrëveshje me Vietnamin