Dorëheqja e Sandër Lleshajt, Enton Abilekaj: Nuk mjafton, protestat janë spontane

Drejtuesi i Dosja.al dhe njëkohësisht gazetari Enton Abilekaj u shpreh për Euronews Albania se protestat e fundit në kryeqytet nuk janë politike, por spontane.

“Protesta e djeshme dhe e pardjeshme janë protesta civile, jopolitike, spontane, jo të organizuara dhe si fillim edhe pasojat e protestave ne i pamë që ishin të paparashikueshme. Askujt nuk i pëlqen që të ketë pasoja të tillë jo të paparashikueshme, që kur ecën në qytet të mos ketë semaforë, por kjo nuk është për të vënë kujën, për të dalë kundër një akti civil, që po bëjnë disa qytetarë në mbrojtje të të drejtave të qytetarëve, në një protestë të humbjes së jetës të një 25-vjeçari. Në këtë protestë janë të rinj edhe të moshave më të vogla, njerëz të pakënaqur të revoltuar, të cilët këtë rast, rastin e vrasjes së Klodianit e kanë parë si një mundësi për të kërkuar drejtësi më shumë sesa për Klodianin. Një drejtësi jo vetëm ndaj represionit që ushtron policia vazhdimisht në pushtet”,  u shpreh Abilekaj.

Z.Abilekaj theksoi se edhe pse të rinjtë e forumeve rinore po përpiqen që protestën ta orientojnë politikisht, nuk e arrijnë dot këtë gjë.

“Nëse anëtarët e forumeve rinore të partive mundohen ta orientojnë politikisht protestën, këta nuk e kanë këtë, këta janë ata që shpërndahen në grup dhe kërkojnë atë drejtësinë sociale”, tha më tej gazetari.

Sipas tij, dorëheqja e Sandër Lleshaj si ministër i Brendshëm nuk mjafton.

“Nuk është e lidhur direkt vetëm më aktin e një polici. Ndoshta në vetvete me një polici që prej kohësh tashmë ka marrë të drejta më shumë se ligji dhe mendojnë që mund ta interpretojë çdo marrëdhënie me qytetarin sipas të drejtës së saj. Mendoj që dorëheqja e Sandër Lleshjat nuk mjaftoi. Mendon që tani ata kërkojnë më shumë, që të ndryshojë policia e shtetit”, tha ai.

Lexoni gjithashtu:

Avokati Llapaj: Lleshaj, një funksionar politik i dobët, gazetari Salianji: Protesta me revoltën më të madhe qytetare

https://euronews.al/aktualitet/2020/12/11/protesta-per-vrasjen-e-25-vjecarit-gure-dhe-sende-te-forta-ndaj-institucioneve-fnsh-perdor-gaz-lotsjelles