Dorëheqja e Thaçit, Milazim Krasniqi: Klasa politike në Kosovë duhet të jetë e bashkuar

Analisti Milazim Krasniqi tha për Euronews Albania se përgjegjësia për aktorët politikë në Kosovë aktualisht është shumë e madhe.

Sipas tij do të duhet të organizohet një takim për të marrë disa vendime që do të ruanin imazhin e shtetit duke marrë parasysh sa e goditur është Kosova nga ky proces gjyqësor që do të ndjekë Thaçi.

Pyetur nga gazetarja Çifligu nëse do të kishte nevojë për ndërhyrjen e ndërkombëtarëve apo klasa politike do të mund ta menaxhonte vetë situatën Milazim Krasniqi pohoi se besonte në kapacitetin e klasës politike por jo në vullnetin e saj.

Analisti sqaroi se duke marrë parasysh se në Hagë kanë shkuar persona me bindje të ndryshme politike ama atje janë bërë bashkë, kjo është një arsye që të forcohet dhe uniteti politik i klasave politike në Kosovë në mënyrë që të krijohet një front i përbashkët për ndërtimin e institucioneve të stabilitetit.

Sa i përket kalimit të kompetencave të presidencës te Vjosa Osmani në bazë të Kushtetutës duke marrë parasysh dhe përplasjet e Osmanit me Thaçin ai u shpreh se besonte në aftësitë politike të saj dhe mendonte se gjithçka do të shkonte mirë por sidoqoftë vuri në dukje ngurtësinë e saj në komunikim.

“Edhe asaj do t’i duhet të jetë pak më e hapur në raport edhe me aktorët e tjerë përfshirë edhe Parlamentin për shkak se ndonjëherë e ka një farë ngurtësie në mënyrën si ajo komunikon por me përgjegjësitë e reja duhet të ketë një mendje pak me të hapur,” – tha ai teksa sqaroi se duke qenë në një situatë kaq të vështirë zi znj. Osmani si z. Hoti do të duhet t’i tejkalonin hatërmbetjet e tyre.