Dosja Epstein, autoritetet britanike vlerësojnë se hetimi ndaj Andrew dhe Mandelson do të përfundojë brenda një viti

Autoriteteve britanike ka të ngjarë tu duhet një vit për të përfunduar hetimet e tyre ndaj vëllait të vogël të Mbretit Charles, Andrew Mountbatten-Windsor, dhe Peter Mandelson, ish-ambasadorin në Shtetet e Bashkuara, në rastin Epstein, tha të martën kryeprokurori i Britanisë.

Mountbatten-Windsor dhe Mandelson u arrestuan veçmas në shkurt pasi Departamenti i Drejtësisë i SHBA-së publikoi miliona dokumente në lidhje me shkelësin e dënuar seksual Jeffrey Epstein, i cili vdiq në burg në vitin 2019. Asnjëri nuk është akuzuar. Të dy thonë se nuk kanë kryer ndonjë shkelje, por “pendohen” për lidhjet e tyre të kaluara me Epstein.

Ish-princi u arrestua me dyshimin se i kishte kaluar informacione të ndjeshme Epsteinit kur ai ishte përfaqësuesi i tregtisë dhe investimeve të Mbretërisë së Bashkuar midis viteve 2001 dhe 2011. Policia po heton gjithashtu akuzat se një grua është marrë në një nga rezidencat e tij në vitin 2010 për qëllime seksuale.

Mandelson është nën hetim për akuzat se ai i ka rrjedhur informacione të ndjeshme Epsteinit kur ai ishte ministër i qeverisë britanike.

Drejtori i Prokurorisë Publike Stephen Parkinson u tha gazetarëve sot se çështja Mandelson ishte “komplekse” dhe “do të ishte gabim të përqendroheshim në një ngjarje ose transaksion të vetëm”.

“Nuk mendoj se dikush duhet të presë që hetimi të përfundojë shpejt”, tha ai.

 “Nuk do të habitesha nëse do të zgjaste një vit, jo sepse nuk është urgjente, por për shkak të kompleksitetit dhe dimensioneve ndërkombëtare”, shtoi ai.