“Drejtësia të flasë”, Meta për tërmetin e 26 nëntorit: S’është dhënë garanci për strehimin

Presidenti i Republikës, Ilir Meta, deklaron se ende nuk është garantuar strehimi i sigurt për shumë familje të goditura nga tërmeti. Në një prononcim për mediat, kreu i vendit kërkoi që drejtësia të thotë fjalën e saj për përgjegjësit e ndërtimeve skandaloze.

“Të shtohen të gjitha përpjekjet për të qenë sa më pranë tyre, me sa më pak propagandë dhe sa më shumë punë e transparence”, theksoi presidenti në fjalën e tij.

A theksoi se strukturat shtetërore duhet të qëndrojnë pranë nevojave të qytetarëve.

“Nderim kujtimit të 51 jetëve të humbura nga tërmeti shkatërrues dhe solidaritet me familjet e tyre dhe gjithë të prekurit nga ajo fatkeqësi natyrore. Një vit më pas, është e papranueshme, që ende nuk është garantuar një strehim i sigurt për shumë familje të goditura më rëndë nga tërmeti. Kushtet e vështira ku jetojnë shumë prej tyre i ekspozojnë edhe më shumë ndaj pandemisë. Të shtohen të gjitha përpjekjet për të qenë sa më pranë tyre, me sa më pak propagandë dhe sa më shumë punë e transparencë”, deklaroi Meta nga Qendra Kombëtare e Transfuzionit të Gjakut.

Teksa kërkon që përgjegjësit e ndërtimeve të japin llogari para ligjit, kreu i shtetit nuk harroi të falënderonte ato vende, të cilat i qëndruan afër Shqipërisë në përballimin e fatkeqësisë natyrore.

“Ndërkohë drejtësia duhet të tregojë kush mbajti përgjegjësi për cilësitë skandaloze të shumë pallateve dhe pronave të qytetarëve. Falënderim për të gjitha vendet mike për ndihmat bujare ndaj popullit shqiptar”, shtoi kreu i shtetit.

Lexoni gjithashtu: 

SPAK-u vijon hetimet për dëmet e tërmetit në Durrës

Euronews Albania në zonat e dëmtuara nga tërmeti, banorët ende në ‘qiell të hapur’: Po flemë në çadra, s’kemi më besim tek shteti

Sot një vit nga tërmeti i 26 nëntorit që shkaktoi 51 viktima, pasoja janë ende të freskëta

115 milionë euro ndihmë, ambasadorët e SHBA dhe BE: Po ndjekim procesin e rindërtimit