Dy lagje të Bleranit në Shkodër të izoluara, vendoset ura e re

Ka nisur ndërhyrja emergjente për vendosjen e një ure të re metalike në zonën e Bleranit, pas dëmtimit të urës ekzistuese. Si pasojë e këtij dëmtimi, dy lagje me rreth 600 banorë kishin mbetur të izoluara, duke vështirësuar ndjeshëm lëvizjen dhe aksesin drejt varrezave të fshatit.

Punimet po kryhen në bashkëpunim mes Bashkisë Shkodër, Ministrisë së Mbrojtjes, Agjencisë Kombëtare të Mbrojtjes Civile dhe Prefekturës së Qarkut Shkodër, nën koordinimin e Agjencisë Kombëtare të Mbrojtjes Civile. Ndërhyrja po realizohet nga Batalioni i Xhenios i Forcave të Armatosura.

Në nisje të punimeve, në terren ishin të pranishëm kryetari i Bashkisë Shkodër, Benet Beci, prefektja e Qarkut Shkodër, Holta Duda, drejtori i përgjithshëm i AKMC-së, Haki Çako, si dhe përfaqësues të strukturave teknike, të cilët ndoqën nga afër ecurinë e ndërhyrjes.

Kryetari i Bashkisë Shkodër deklaroi se reagimi ka qenë i menjëhershëm me qëllim shmangien e izolimit të komunitetit, duke shtuar se situata në territorin e bashkisë është ndjekur në mënyrë të vazhdueshme, pavarësisht reshjeve intensive dhe prurjeve të larta të ditëve të fundit.