Dyndje në kufijtë e Ukrainës, qytetarët kërkojnë të largohen

Me mijëra qytetarë ukrainas kalojnë ditët dhe netët të bllokuar në trafik dhe në kufij me shpresën se do të largohen nga vendi i tyre, i cili po përjeton sulme të njëpasnjëshme.

Ata vërshojnë në kufirin me Poloninë, e cila është shprehur e gatshme t’i ndihmojë dhe t’i strehojë.

“Po qëndrojmë këtu për një kohë të gjatë, kemi 6-7 orë këtu, por është çmenduri, ka shumë trafik. Nuk e di sesi të largohem nga vendlindja ime. Unë nuk dua të largohem nga atdheu im, por për shkak të pushtimit duhet të largohem sa më shpejt të jetë e mundur”, u shpreh Tamara Kulman, një qytetare e Ukrainës që po largohet.

Ata që ia dalin të kalojnë kufirin marrin ndihmë nga disa vullnetarë, të cilët janë organizuar për t’i ardhur në ndihmë.

“Ne kemi organizuar tashmë një rrjet njerëzish që do të jenë të gatshëm të ndihmojnë me strehimin, punësimin, transportin. Dhe tani për tani kemi gjetur strehim për rreth 12 familje”, tha Wiktoria Magnuszewska.

Ata që kalojnë kufirin nuk e dinë se kur do të mund të kthehen. Ukrainasit e larguar gjejnë një zgjidhje të përkohshme për situatën e tyre, me shpresën se ajo nuk do të jetë e përhershme.

Për lajme më shumë rreth ngjarjes klikoni këtu.