E drejta e protestës, Gjykata Kushtetuese shfuqizon parashikimin e Kodit Penal për leje nga autoritetet

Gjykata Kushtetuese ka vendosur sot të shfuqizojë togfjalëshin “pa marrë më parë lejen nga organi kompetent sipas dispozitave të veçanta” nga neni i Kodit Penal për Organizimin dhe pjesëmarrjen në grumbullime e manifestime të paligjshme.

Kjo kërkesë iu parashtrua Kushtetueses nga Gjykata e Apelit të Shkodrës, me arsyetimin se ky përcaktim ishte i papajtueshëm me nenet 17, pika 1 dhe 47 të Kushtetutës së Republikës së Shqipërisë, që lidhet me të drejtën e tubimeve.

Gjykata Kushtetuese ngarkoi Kuvendin të plotësojë normën ligjore nga data e shpalljes së vendimit të Gjykatës Kushtetuese deri në hyrjen në fuqi të tij.

“Ky vendim është përfundimtar dhe hyn në fuqi 6 muaj pas botimit në Fletoren Zyrtare,” njoftoi Kushtetuesja.

Neni 262 i Kodit Penal parashikon se “Organizimi i grumbullimeve dhe i manifestimeve të personave në sheshe dhe vende të kalimit publik, pa marrë më parë lejen nga organi kompetent sipas dispozitave të veçanta apo kur nga organizatorët shkelen kushtet e parashtruara në kërkesën për dhënie të lejes, përbën kundërvajtje penale dhe dënohet me gjobë ose me burgim gjer në një vit.”

Gjithashtu parashikohet se “pjesëmarrja në një grumbullim apo manifestim të paligjshëm edhe pas paralajmërimit të bërë për shpërndarje, përbën kundërvajtje penale dhe dënohet me gjobë ose me burgim gjer në tre muaj. Po kjo vepër, e kryer më shumë se një herë ose kur ka sjellë pasoja të rënda, përbën kundërvajtje penale dhe dënohet me gjobë ose me burgim gjer në dy vjet.”