E hëna ditë zie në Kosovë, Osmani ndërpret vizitën në Japoni, Kurti niset për në Kroaci

Presidentja e Kosovës, Vjosa Osmani ka shpallur ditën e hënë, ditë zie, shtetërore në nderim të qytetarëve të Republikës së Kosovës, që humbën jetën tragjikisht në aksidentin e ndodhur në Kroaci. Gjithashtu Osmani ka ndërprerë vizitën në Japoni dhe nesër do të udhëtojë për në Kosovë.

Ndërkohë Kryeministri i Kosovës, Albin Kurti është nisur për në Kroaci për të vizituar shqiptarët e plagosur në aksidentin tragjik të mëngjesit të sotëm, të cilët po marrin trajtim mjekësor në spitalin e Slavonski Brodit.

Së bashku me kryeministrin kanë udhëtuar zv.kryeministrja dhe ministrja e Punëve të Jashtme dhe Diasporës, Donika Gërvalla, ministri i Punëve të Brendshme, Xhelal Sveçla, ministri i Shëndetësisë, Arben Vitia dhe shefi i Stafit të Kabinetit të Presidentes së Kosovës, Blerim Vela.

Ndërkohë qeveria e Kosovës ka themeluar Shtabin Emergjent për koordinim të komunikimit të institucioneve të Kosovës dhe të Kroacisë me familjarët e bashkatdhetarëve të cilët udhëtonin me autobusin e linjës Frankfurt-Prishtinë.

Kryeministri i Kosovës shprehet se ka marrë një telefonatë nga homologu i tij kroat, Andrej Plenkoviç, i cili e ka siguruar për marrjen e të gjitha masave për shpëtimin e jetëve mes të plagosurve.

Gjatë kthimit nga Gjermania, një autobus me emigrantë shqiptarë nga Kosova u përfshi në një aksident në Kroaci duke lënë 10 të vdekur dhe të paktën 12 të plagosur rëndë.

LEXONI GJITHASHTU:

• Përgjumja e shoferit të autobusit mund të ketë shkaktuar aksidentin me 10 viktima në Kroaci
• 10 të vdekur e 44 të plagosur nga aksidenti i një autobusi të Kosovës në Kroaci