Edvin Libohova nuk do të jetë më president i Ligës Profesioniste të Futbollit. Lajmi u konfirmua për Euronews Albania nga vetë Libohova, i cili tregoi se ky ishte një vendim i tij.

“Po, ishte vendim i im. Arsyeja? Pamundësia për të ndjekur dhe mbështetur më tej zhvillimin e Ligës dhe konflikti i interesit duke qenë dhe pjesë e strukturave të Federatës Shqiptare të Futbollit (FSHF),” – tha Libohova duke shtuar se do të qëndrojë në krye të Ligës deri sa të zgjidhet kryetari i ri.

Liga Profesioniste e Futbollit u krijua më 17 dhjetor 2018 si një organizëm që do të përfaqësonte interesat e klubeve të ligës superiore dhe do të merrte përsipër menaxhimin e aktiviteteve të kampionatit. Në mbledhjen e parë konstitutive u zgjodh president i saj Edvin Libohova, i cili ishte edhe asokohe në postin e zëvendës-presidentit të FSHF-së.

Pavarësisht se edhe asokohe ai ishte në konflikt interesi, ai mbeti në drejtim të Ligës Profesioniste deri më sot. Ndër nismat më domethënëse gjatë kësaj periudhe për Libohovën, ishte dalja në vendimin për bojkotin e kampionatit në fillim të këtij sezoni. Bojkot që u bë për ta vënë në trysni qeverinë në mënyrë që të rishikonte ligjin për sportin.

Aktualisht përveç Libohovës, zëvendës-president i FSHF-së është edhe Lutfi Nuriu.

Lexoni gjithashtu:

Klubet tërhiqen nga bojkoti, të dielën nis Kupa e Shqipërisë, të mërkurën kampionati