Liderët e BE-së ranë më në fund dakord për embargon ndaj naftës ruse. Kompromisi i arritur përfshin heqjen graduale të naftës së nxjerrë nga deti.
Ndërsa ka një shpërndarje të naftës nga naftësjellësi Druzhba, që furnizon Hungarinë, Republikën Çeke dhe Sllovakinë, ai përbën vetëm 10% të importeve të BE-së.
Kjo do të thotë se brenda fundit të vitit, Evropa do të blejë 90% më pak naftë nga Rusia. Por çfarë do të thotë kjo për financimin e luftës ruse ndaj Ukrainës?
“Impakti do të jetë i madh për Rusinë, pasi ajo nuk do ta ketë të lehtë të zëvendësojë tregun evropian me blerës të tjerë. Ka edhe një sërë problemesh të tjera si infrastruktura, që e bën të vështirë ndryshimin e rrjedhës së naftës; kapacitetet e porteve për të rritur ngarkesat; aftësitë për të gjetur cisternat e duhura për transportin. Pa harruar faktin se dërgimi i këtyre cisternave në Evropë kërkon shumë më pak kohë se dërgimi i tyre në Azi”, tha eksperti Simone Tagliapietra.
U desh thuajse një muaj për ta arritur marrëveshjen, pasi kryeministri hungarez bëri kundërshtimet më të zëshme. Por tani nuk dihet se sa do të zgjasë përjashtimi i Hungarisë.
Për më tepër, Polonia dhe Gjermania mund të përfitojnë nga një fazë e veçantë e nxjerrjes së naftës ruse deri në fund të vitit pasi të dyja përdorin pjesën veriore të tubacionit të Druzhbës, gjë që ka shkaktuar kritika.
“Gjermania ka bërë një punë të mirë për shkëputjen nga vartësia e naftës ruse dhe kjo është arsyeja përse ne shpresonim ndërprerjen e menjëhershme të importeve. Por tani kjo do të ndodhë në fund të vitit”, u shpreh Sergey Lagodinsky, deputet i të Gjelbërve.
BE i paguan Rusisë rreth 20 miliardë euro në muaj për naftën, ndaj pritet që marrëveshja të ketë një impakt të fortë.
LEXONI GJITHASHTU: