Efektivë të policisë kallëzojnë në prokurori Pjerin Ndreun, reagon kryebashkiaku

3 efektivë të Policisë së Lezhës kanë kallëzuar në prokurori kryetarin e Bashkisë, Pjerin Ndreu.

Shkak i këtij kallëzimi është bërë muzika e lartë në një lokal katër ditë më parë po në këtë qytet pasi në bazë të aktit normativ muzika duhet të kishte ndaluar në orën 22:00.

Si pasojë e kësaj dhe ambientit të mbipopulluar, efektivët e Policisë që kanë qenë në shërbim janë afruar por pronari i lokalit ka refuzuar t’i bindet urdhrit të tyre.

Sipas këtij kallëzimi, në momentin që patrulla do të shoqëronte pronarin e lokalit, Ndreu ka ndërhyrë duke deklaruar se “ligjin e bën ai”.

Ndërhyrja e bërë nga kryetari i bashkisë së Lezhës, Pjerin Ndreu ka bërë që efektivët në shërbim të ngrenë një kallëzim në prokurorinë e Lezhës, në mënyrë që të mbahet përgjegjësi ligjore për personat që kanë penguar ushtrimin e detyrës së Policisë së Shtetit.

Ndërkaq për ngjarjen ka reaguar dhe vetë Pjerin Ndreu përmes një postimi në faqen e tij zyrtare në Facebook, ku ka deklaruar se Policia e Shtetit ka kapërcyer kompetencat dhe ka kryer veprime në kundërshtim me ligjin.

Sipas tij efektivët kanë ndërhyrë në një darkë zyrtare ku kanë qenë të pranishëm 15 kryetarët e komunave të Kosovës, me veprime të dhunshme ndërkohë që nuk kanë shkruar gjobën, që siç tha dhe Ndreu është detyra e tyre sipas ligjit.

“Pretendimi që janë fyer është mënyrë për të shmangur tejkalimin e kompetencave, veprimet e dhunshme në një darkë zyrtare dhe shpërdorimin e detyrës duke mos vepruar në lokalet e tjera që ishin hapur pothuaj të gjitha”, shkroi Ndreu.

Ai kërkoi ndjesë për tejkalimin e orarit duke cilësuar si të përshtatshme një gjobë, por jo veprimet e dhunshme.

“Nesër do ju drejtohem me një shkresë me sqarimet përkatëse, për Drejtorin e Përgjithshëm të Policisë, Drejtorin e SHÇBA dhe prokurorinë e cila duhet të pyesë me cilësinë e dëshmitarit të gjithë personat pjesëmarrës në darkë”,  përfundoi kryebashkiaku i Lezhës qëndrimin e tij.

LEXONI GJITHASHTU: 

• Shkarkohet Voltana Ademi, Pjerin Ndreu në krye të Shoqatës së Bashkive
• Përmbytjet në Lezhë, Pjerin Ndreu: Ka përmirësime, por situata mbetet problematike
• Tërmeti në Lezhë, Pjerin Ndreu: Pallati 12-katësh asnjë rrezik, konkluzioni nga ekspertët izraelitë